في عظم رزء كربلاء
عگلي ما سكن بالراس بس هام...إو گلبي ما يحمل الفرح بس هام
أخيط إجروح رمي الدهر بس هام...وأضمّدها إبمصاب الغاضريه
* * *
أنة وألم
سهم الدهر نيشانه وعينه...هدم دار الحمه إلبيها وعينه
وحگ إچفوف أبو فاضل وعينه...إمن أشوف إلماي أجر ونّّه خفيه
* * *
بكاء الحوراء عليها السلام
دمعي مثل دم حسين بالراي...من سهم المثلث نبت بالراي
إو بيدي خنجر الجمّال بالراي...گطع چف الحسين إو گطع بيّه
* * *
أنـه إبشده إو علي يصعب محلها...إو ربوع الخير وافاها محلها
سُميّه وهند يتخدر محلها...وأنه إربات الخدر صرت أجنبيه
* * *
النوايب أگبلت وأصـعب مردها...عليّه إو صار دلالي مردها
چبدتي سهم المثلث مردها...إو من إصواب الحجر علتي خفيه
* * *
ما أعظم مصيبة الشام
هلي تتذبح إگبالي وناره...إو صبري هوّن إمصابي وناره
إلشام إلشام والمجلس وناره...تشب إو تنطفي إبكل فاطميه
* * *
الفلك هدم عوالينه وذبنه...إو سلتنه نار المخيم وذبنه
للإسلام جاهدنه وذبنه...علم للدين برض الغاضريه
* * *
أخويه إلما فتر عزمه ولاچن...أنياب الدهر عضنه ولاچن
إنذبح عطشان بأرض الطف ولاچن...روه إمن السلسبيل العذب ميه
* * *
مر يصعب عليّه الدهـر مرهان...چاسات الليـالي شفت مرهان
من ظل جسم أخويه حسين مرهان...عله وجه الثره بالغاضريه
* * *
