يهل الشيم زينب تراني...ياهلي إوماضيكم كفاني
إمخدره إو خدري ماله ثاني...وإبيوت خدري والمباني
متطلسمه إبسبع المثاني...ألله من دهري إو زماني
وإبسهم فرگاكم رماني...ومن العتب گصر لساني
وسهم الطفل صكني إو عماني...إو عامود أبو فاضل سباني
وبكربله دهري ولاني...إبجمرة عرس جاسم چواني
* * *
من طاح بالميدان الحسين...وسهم المثلث وسده البين
والمهر رد إعله الصواوين...إينادي الظليمه وتدمع العين
إمخضب إبدم إبن الميامين...وإطلعت زينب والخواتين
وإتصيح إجتنه النايبه إمنين...يا مهر گلي إبهالميادين
عفت العميد إليعز عالدين...مسلوب جسمه ومنصرع ويـن
ننطي الوجه من عگبه لا وين...ودارت علينه الگوم صوبين
* * *
أنا إبيوت المعالي خدرتني...أنا إرماح العوالي حافظتني
أنا إسيوف الهواشم ناطرتني...أنا إعيون ألأجانب ما رأتني
زينب أنأ إو عفتي كفتني...سود ألليالي حاربتني
وسوط الغدر طگني إعله متني...والداهيه إلكبره إلدهتني
طبرات ألأكبر وذرتني...وطعنات جاسم وزعتني
وحسرات عبدألله إحرگتني...وطيحت گمر هاشم سبتني
وضيعة حسين الضيعتني...وللشام عدواني خذتني
* * *