جابر يجابر...لا تبطل الونه
لا زال تسمع كربله إو طاريها...ولا تبطل الونه
* * *
هالچيف تتصبر يجابر وتهود...وكربله تنساها
وبكربله تدري من أهلنه إشمفگود...وإشجـره من إرماها
وهذي أراملنه ويتامانه شهود...ردت الولياها
إفگد ضعنه...ولا تبطل الونه
وإنته إتعـرف زينب إشصاير بيها...ولا تبطل الونه
* * *
هذي بجابر كربله وإللي صار...بيها يتراوالي
وهذي الخيم يا جابر وهذي النار...تسعر إبدلالي
وصد إعله حـالي وتكتفي من ألأخبار...من تصد الحالي
صـد الرگبتي...ولا تبطل الونه
وسّا تشوف إبجامعه إمطويها...ولا تبطل الونه
* * *
والنوب أزيدك هظم يمرد بالروح...والگلب يتمرمر
وهنا يجابر وجرت نار النوح...والنحيب إتكاثر
وهنا يجابر شفت أبويه مذبوح...بالسيوف إموذّر
حن إعله أبويه...ولا تبطل الونه
وحن عالجسوم البالدمه إمعفريها...ولا تبطل الونه
* * *
وچتل الزلم هين يجابر أمره...والچتل عادتها
خلي الهواشم نايمه إعله الغبره...وبالگلب جمرتها
وإنشدني عن حـالة بنات الزهره...عگب عين إخوتها
حـن السبيها...ولا تبطل الونه
مسبيه راحت والعـده تباريها...ولا تبطل الونه
* * *
دسمع شسولفلك يجابر وأشجيك...وأمرد بدلالك
وأدري الجره بحـال الفواطم ياذيك...وإيتغير حالك
وحالة يتامه الغاضريه إتبچيك...والصبر چتالك
حـن عاليتامه...و لا تبطل الونه
يشجيك ونها إو نتك تشجيها...ولا تبطل الونه
* * *
ريتك يجابر تنظر الحادي النوگ...عالحرم يتأمر
وريتك تشوف إبرگبتي إشلون الطوگ...شيحفر وإشأثر
وآنه أبسلاسل عله الناگه مشبوگ...والدمع يتحدر
نوح إعله دمعي...ولا تبطل الونه
وحـن عله إمتوني إلچانو إمگيديها...ولا تبطل الونه
* * *
دسمع أبيّنلك يجابر تفصيل...كربله وعملتها
وهنا يجابر چانت إتجـول الخيل...للجثث سحـگتها
وإعله الحريم إشصار من صار الليل...ما خفت ونّتها
حـن عالكفلها...ولا تبطل الونه
وإنحب عله الرايه إو فگد راعيها...ولا تبطل الونه
* * *
ريتك يجابر حاضر تشوف إشلون...هالحـرم ضيعتها
ما غفت عگب حسين لعياله إعيون...من دمع غربتها
والسوط ما خله للأيتام إمتون...والعصي لوعتها
حن وإنحب إلها...ولا تبطل الونه
وعينك من إدموع الحزن صفيها...ولا تبطل الونه
* * *
عمي يجابر وحگ گطع الچفين...والعليها إتخوصـر
إي وحگ دم إللي صبغ شيب حسين...من وريد ألأكبر
بالكوفه ما شرهت لعد زينب عين...وعالخلگ تتفكر
حن إعله زينب...ولا تبطل الونه
ونار الشماته إبدمعتك طفيها...ولا تبطل الونه
* * *
إي وحگ حنة جاسم إلمن إدماه...خضّبوله إچفوفه
جور الذي بالشام صار وشفناه...أعظم من الكوفه
يا ريت حاضر مجلس الطبيناه...والصبرنه إتشوفه
حـن إلصبرنه...ولا تبطل الونه
وإعلـه الطشت ونـّتك لا تخفيها...ولا تبطل الونه
* * *