طفلة الحسين تموت
«شيعتي»
طفله من يتـامه الغاضريه...بالشامات وافتها المنيه
إو شبگـت راس الحسين...والزينب سبتها
* * *
طالعت تاريخ عملة كربله وإندهش نوعي
سهم من گوس المصايب صابني إو خيط إضلوعي
إو من دمه إنحور الضحايه غدت تتفايض إدموعي
إو شفت الضحايه إموزعه...والروس منها إمگطعه
إو شفت الحسين ومصرعه...إندهش وضعي إو زاد روعي
إو گلبي ظل يـّحوم إعله ألأرامل...إو نار الخيم تتواگد مشاعل
وإحترگت صواوين...والزينب سبتها
* * *
چني ويّه الظعن ساري من تصده السبي الكوفه
مررونه إعله المعاره إو شفت بيه إشلون شوفه
هذا مسحوگ المفاصل إو ذاك المگطعه إچفوفه
والجثث عريه إمخذمه...إو حالة ودايع فاطمه
نشّفت من جسمي الدمـه...إو گلبي عالسجاد خوفه
مكسور الگلب والجسم ناحل...من الجـامعه وثگل السلاسل
وإمگيّده المتنين...والزينب سبتها
* * *
سايرت سبي الحريم إو روحي مسبيه إلسبيها
حرم مسبيه إو غريبه إو بالسياط إملوعيها
شدة الكوفه نستها الشام من بين عليها
چا وين سبع الگنطره...وإيشوف بالشام إشجره
وإعيال عنده إميسره...إو بالخرابه إمنزليها
إو من ضرب العصي صـارت علامه...بمتون ألأرامل واليتامه
وإتشاجـف بإلإيدين...والزينب سبتها
* * *
فزّت إمن النوم طفله وإبگلب مجمور يلهب
إتشوط نوبه إعله اليتامه إو نوبه تتعلگ إبزينب
إتصيح أبويه حسين وينه گلبي لفراگه تعطب
يا عمه شفته إبنومتي...وإنمرد چبده الحالتي
وإنكسر گلبه إلغربتي...وإبمصيبتنه تصوّب
عمه إو صدر أبويه إمكسرينه...إو ليش إبـدم وريده إمغسلينه
والتربـان تچفين...والزينب سبتها
* * *
هيجت نار الگلوب الچامنه بيها عللها
إو خلت إعيون الفواطم دمعة الغربه تهلها
إو رجفت الشام اليساره بالنحب لمصاب أهلها
صاح إبن هند إعله الخدم...شمروّع إگلوب الحرم
صيوان عزّتها إنهدم...خل تنوح الدهر خلها
نادوه اليتيمه إتريـد أبوها...إو بالنوح إليساره إيساعدوها
وفاضت دمعة العين...والزينب سبتها
* * *
صاح يا غلمان هذا الراس ودّوه للتريده
إو خل تجر لمصابه ونّه إو تنحب الحزّة وريده
إو خل تشوف الخيزرانه إشسوت إبثغره إو تچيده
ألله الله إشعمل...والراس لعياله إنحمل
إو خيّم عله الطفله ألأجـل...إو راحت الطفله شهيده
إو غمضت عالطشت عين اليتيمه...إو ماتت يالعلي وألله إشهظيمه
وإرتجت الكونين...والزينب سبتها
* * *
وإنحنت مفجوعه زينب عله الطفله إو گلبتها
ما لگت روح إبجسمها إو عله القبله مددتها
والمصيبه عله المغسّل صاحت إللي غسلتها
مسمومه طفلتكـم گضت...نادوها من إتيسرت
بالخيزران إتلوعت...والسياط الوسّمتها
مصـرع هاليتيمه إعله اليتامه...مثل مصرع حسين إوعمامه
إو أثّر عالخواتين...والزينب سبتها
* * *
