للكوفه طب اليوم ضعن اليساره...إو جسم الشهيد حسين ظل بالمعاره
* * *
آل أسد ما تدرون بالغاضريه...إشصار إعله ابو السجاد والفاطميه
إو بالجثث ما تدرون فوگ الوطيه...ظلت ثلث تيام دمها إيتجاره
* * *
آل أسد چم إصواب من هالمصيبه...إو ظلت إعيال حسين عدكم غريبه
إو حرگ الخيم ما هاج بيكم لهيبه...إو لا منكم الفـزّاع وإيطفي ناره
* * *
آل أسد بألله إيهون حرگ المخيم... والجره إبحال حسين يا آل أسد أعظم
يتچفن إبتربان يتغسل إبدم... إو تگصر هممكم ليش عن إنتصاره
* * *
آل أسد عاد اليوم هيجو إبحميه...شيلو الجثث بس عاد تبگه رميه
وإمگطعه بسيوف گوم آل أميه... وألأجر للدفان عدكم أخباره
* * *
وعالمشرعه العباس حامي الضعينه... وإمگطع الچفين جسمه رهينه
وأنخاكم إتجرون سهم إلبعينه ...إو عالمشرعه إتعينون گبره إو مزاره
* * *
إو عدكم طفل مطروح مگطوعه إيده...أنوه الشهاده إو حاز نيّه سعيده
بألله برفج شيلوه جرحه يچيده...إو گلبه العطش ماذيه يبس أثماره
* * *
آل أسد وإتشوفون طبرات ألأكبر ...وإشكثر متعدون طبراته أكثر
إو ظلت إبگلب حسين نيرانه تسعر...إوهذا ألأمر محتوم غامضه أسراره
* * *
والجاسم العريس لتضيعونه...متحني من إدماه وإنثاره دونه
بألله إبرفج ويّاه من تدفونونه...إو رمله گلبها إعليه زاد إنكساره
* * *
إو عبدالله من تلگوه منحز ورده...والسهم صاير طوگ وإمحلي جيده
إو عبدألله ما تدرون شنهو اليريده...چاس الشهاده إو بيه زاد إفتخاره
* * *