ريّض هاك يالناعي وخذ منّي...عتب للبلغري عاني اومتعنّـي

عاني متعني خذ معصب اومرسل...أخذ مسره ابطريج العيب بيه انزول
لاچن گـول مـنّه تصـل شتگـول...حيدر والدي لو ناشدك عنّي

يگلها الخاطرچ لگطع ادروب اخطار...وأصب الدمع من دم والدمع شطّار
اطب وادي النجف وأنده يحامي الجار...معصب زينب او كتب العتب ذنّي

عنّك معصبي و كتب العتب ليكون...لاچن كون تنده وين ليث الكون
شبل احسين گلّه اطعين هذا ايهون...والعرّيس جاسم بيش متحنّي

اگلّه حنّت الجاسم ابدم نحره...او شبل احسين قلّه اتوسد الغبره
و قله انته الذي يالصاير بيه ادره...و گله الثار ما ينراد له اتوني

لا والله و بعد تثني و تحوربله...تخبره ابحال سبع الگنطره شبله
او عبدالله الطفل مفطوم بالنبله...گلّه و بعد شو شتريد سايلني

چي ماگول گوم الشبلك اوشوفه...اوگلّه اعله الشريعه امگطّعه اچفوفه
أگلّه و طاح طاعون اعله اهل كوفه...دعه ابكل دار منها الصايح امجنّي

ارشد والنعي لحسين مضمونه...ما والله وره ابن أُمّي ولا من دونه
گلّه ابمهجة الزهره و ضوه اعيونه...ماجور او عــدوّك نام متـهـنّي

اخبره اشلون بالنص من وگع يمّه...امتثل وتصوّر الحمزه انچتل عمّه
شاف الدين تشييده ابهدر دمّه...گال امطيع يسيوف العده اخذنّي

خذنّه اسيوفهم وستفصلو كل دين...عنّ الطف تگلّه غاب شخصك وين
گلّه اتگول زينب عگب عين احسين...عليمن والـدي الكـرّار تاچـلنـي

گلّه امن المدينه و تحضر ابأيوان...مع بعد المسافه و تدفن السلمان
ليش احسين خلّيته يعالي الشان...عنّك يوم واحد خيّـبت ظـنّـي

عنّك يوم واحد چي يظل مطروح...عنّك يوم واحد چي يساره انروح
انوح و ناوحنّي الناوحن بالدوح...أحن والبل تحن اللوعتي و حنّي

أحن أيتام عندي و حرم والي تريد...هاذه انصاف واحنه اشراف نگطع بيد
فوگ امصابنه السجّاد غل و قيد...فوگ المحنة الـويّاي مـحّـنّـي

محّـنّـي علي السجّاد چي يرضيك...مـسبـيّات خـدّركم للمـعاديــك
چي ياوالدي تقبل الشيمه البيك...بالمجلس اعيون اعداك يارنّـي

تراني اعيونهم و أُوگف ابجلستها...ما ينّام لا والله اعلـه هـظـمتها
وشوف اچفوف شمّاتي امخضبتها...زلم والغيد عدها اطبول وتغنّـي

دگ اطبول وتغنّي اوبديها اخضاب...وآنه أهيل بچفوفي اعله راسي اتراب
امن أگصه الدير تسمع نده القصّاب...وآنه ابكربله چي تعـتذر مـنّـي