زينب في حيرتها
بالمعـاره إتصيح زينب الكبره
وين أخويه حسين مهجة الزهره
* * *
زينب إتنوح وتنادي والدمع هالي
مني يا هالناس أضحه منفجد والي
(إبضيعة حسين إو چفيلي ضاعت آمالي)(1)
إبحالتي يحسين يگصد (إلينجره)(2)
* * *
إمحيره وتلوج ظلت بالمعاره إتنوح
وتنخت إو تجذب الونّه من چبد مجروح
ولن أخوها حسين عاري إعله الثره مطروح
جثته إبـلا راس منسحگ صدره
* * *
وسهم المثلث إويلي نابت إبگلبه
ونابته إبجسم أبو اليمه چم وچم حربه
مرضرضه إضلوعه (وسافه)(3) إبحافر السربه
والدمه عبرات يجري من نحره
* * *
شافته مطروح أخوها سابح إبدمه
ومنذبح عطشان ضامي والنهر يمه
طاحت إعله حسين زينب تبچي وتشمه
وگـامت إتجلب طبرةٍ طبره
* * *
نادته يحسين خويه يا شبل حيدر
يا عزيز الروح نايم بالشمس والحر
وعالثره مطروح عاري جسمك إموذر
ورادت المعبود هالأمر يجره
* * *
نادته يحسين خويه منهو حز نحرك
ومنهو بالحافر يعزنه إمهشمه إلصدرك
ومن ذبح يحسين گلي طفل إلبكترك
ومنهو گص إيده إو وسده الغبره
* * *
بين ما تنعه وتخاطب عز بني هاشم
لن إجاها السوط ويلي من زجر ظالم
ودعت عزها رميه إعله الترب نايم
ونادته ماشين لاچن إبعبره
* * *
نادته أدريك خويه صاحب إمروّه
وأنضرب يحسين دونك وأنسحب گوّه
ادري متخليك تهجع شيمة الخوّه
لاچن إموذر وذرةٍ وذره
* * *
أيست إو صدت تنادي حامي الضعينه
من وطنّه إبشيمتك يا بو الفضل جينه
إبولية العدوان بالطف لا تخلينه
چي عليك إيهون أمشي أميسّره
* * *
(1) في الجزء 5 لا يوجد هذا البيت وهو من نظمنا.
(2) في الجزء 5 (بخيره).
(3) وضعنا هذه الكلمة لمراعاة الوزن.
