زينب تنعت للمعاره إتنادي يحسين
وإمنين إجتني كربله إو هالنايبه إمنين
* * *
يحسين يبن أمي إو ثمر گلبي إوخليلي
سهم المرد گلبك مرد گلبي إو دليلي
إو ظلت إعيوني ساهره إو ما نمت ليلي
وأحسب إحساب الغربتي وأصفج بالإيدين
* * *
ألله من شافت وليها إعله الوطيه
طاحت عله جسمه إو تجر ونّه خفيه
يحسين كلمني إبجاه أُمي الزچيه
يا جرح گلي ضاهدك يا قرة العين
* * *
يا ريت سيف الحز ويدك حز وريدي
إو خنجر الگص إيدك لونّه گاطع إيدي
يحسين أريد إوياك أظل لو يطح بيدي
ويّاك أظل إبلا غسل وإبغير تكفين
* * *
وأحنت ضلعها إو شمت حسين إبوريده
وإتجلب إجروحه إو تدوّر عاليچيده
زينب لعد إصواب المثلث تريده
وإمنين صارت طبـّته والمطلع إمنين
* * *
ودعت جسم حسين عالغبره رهينه
إو گامت تحوم إعله الجثث وَلْها إو حزينه
وإتصيح وين ألأكبر إو جسّام وينه
إو لن جاسم إبدم رگبته إمخضب الچفين
* * *
صاحت إمبارك حنتك يا مهجة الروح
تتناك رمله إو جاعده لفراگك إتنوح
ما درت بيك إمخضب إبدمك إو مذبوح
وأخذت النار إمصيبتك ويّه الصواوين
* * *