أين خيّالك يا مهر الحسين (عليه السلام)
«ميمر مذيل»
ريّـض إو تانيني...يالمهر حاچيني
تصهل إشمالك...وين خيّالك
منصـرع دليني...يالمهر حاچيني
* * *
سهم المثلث من گطع گلب حسين...وإجروحـه كثره
من مهره ساجد هوه إبمحراب الدين...والقبله صبره
إو بالمهر چني واجف إبذاك الحين...وأدهشني أمره
بالتـرب يتـّرب...بالدمه يتخضب
ومنمرد حـالي...إو صاح دلالي
منفجـع تدريني...يالمهر حاچيني
* * *
عيني العمه إو لا شاهدت ذاك الحـال...يشهدلي ربي
ظهر المهر محني إعله خياله إظلال...وعيونه تربي
وإصرخت لا تلچم إصوابه الچتال...وإگطعت گلبي
إضلوعـك المحنيه...إو گصتك المدميه
صابت إعيوني...وأدمت إجفوني
وإنطفـه إصبي عيني...يالمهر حاچيني
* * *
چم دوب حايـم يالمهر عالمصيوب...إگصد إخيامه
مطروح خيّالك إو سرجك مگلوب...والدم علامه
إتلاگيك زينب والگلب منها إيلوب...ترجه السلامه
لو رحـت بعلومه...وآنه أظل بالحومه
يم أبو اليمه...وأسبح إبدمه
وأنتحـب خليني...يالمهر حاچيني
* * *
ألله عالتل المهر لمّن صار...صاح الهظيمه
إو شـاف المخيم نار وإتذب النار...خيمه إعله خيمه
ويسمع صريخ العايله يا ستار...طحنه إبظليمه
إو شـاطت المحجوبه...عالمهر مرعوبه
إو لزمت إعنانه...إبروح خلصانه
مگبلك سـابيني...يالمهر حاچيني
* * *
چن المهر ناداها بلسان الحال...وإلسانه نوحه
مصيوب أخوچ إبسهم مـاضي إو چتال...تنزف إجروحه
ألف إو تسع مية جرح ما ينشال...وإخلصت روحه
من سهم غربتها...فجّرت دمعتها
يالثگل ونّك...رادتي منك
المصـرعه إتوديني...يالمهر حاچيني
* * *
چني المهر ناداها گلبي مخطوف...وإخطفه المصرع
وألله يزينب ما إلي عين إتشوف...گلبي إيتگطع
إبزان إو نبل وإرماح وأشفار إسيوف...جسمه توزّع
جيتـچ إبهالعينه...دمه وإتعرفينه
إخذي إعلومه...مني إدمومه
نـادته حنيني...يالمهر حاچيني
* * *
وإعله المهر للحرم صارت حومه...صرخت يتامه
وإبناصية مهر الحسين إعلومه...دم الكرامه
وإنخبط دمع الحرم ويه إدمومه...وأمضت إسهامه
زينب إو موقفها...إعله الصبر شرّفها
يالمهر هونك...والصبر عونك
والصبـر يكفيني...يالمهر حاچيني
* * *
