صرخة الحوراء زينب عليها السلام
«شيعتي»
(زينب تعنت للمعاره إتنادي يحسين)...هالنايبه إمنين
حرمه إو غريبه إبكربله والدهر سابيني
* * *
لفت زينب للمعـاره وإتّعكّز عالـرزيه
شافت إشبول الهواشم وألأنصار إعله الوطيه
إمغسله إبدم الشهـاده إمچفّنه إبذاري الحميه
وگفت الحره إمحيّره...صاحت إو مدمعها جره
يالنايمين إعله الثره...عسن نومتكم هنيه
وإنتو رضيتو بالشهـاده وإحنه راضين...هالنايبه إمنين
وإصواب گلبي إيهون وإصوابك إلماذيني
* * *
حنّت إو ونّت إو صاحت يخوتي دهري ولاني
من رمـاكم عله الغبره إبولية إعداكم رمـاني
إو صابني إبسهم الشماته إو فگّـّس إعيوني إو عماني
وياكم الشوف إنفگد...شتحمّل إو شصبر بعد
گلبي تگطع وإنمرد...والگطع گلبي زماني
وإحنـه إبمطاليب اليسر وإنتم مطاعين...هالنايبه إمنين
وإمنين ما صد النوايب سهم ترميني
* * *
إمخدره عشت بحياتي إو لاغرب شافت خيالي
يا هلي وإظلال بيتي إسيوف وإرماح العوالي
كربله الهدمّت بيتي كربله الكفّت إظلالي
أحّا يجمرة كربله...أحّا يالمفارج هله
أحّا علـه المتدلـله...إو راح ويّاكم دلالي
گلبي المدلل ميحمل جمـرة النارين...هالنايبه إمنين
نار السبي إو نار المعارك هالتچويني
* * *
إتگوم من يم جسم تگعد يم جسم والدمع هامل
إو كل جسم خله إبگلبها النار تتواگد مشاعل
لاچن الكسّر ظهرها جسم مسحون المفاصل
والسهم نابت بالگلب...والدم من أوداجه يصب
والجسم عاري إعله الترب...إو زور من النبل حامل
يحسين صاحـت والمثلث صاب گلبين...هالنايبه إمنين
وإصواب گلبي إيهون وإصوابك الماذيني
* * *
هالله هالله إشلون طيحه طاحت إعله حسين زينب
شبگته إو شمّت وريده إو گامت إبدمه إتّخضّب
جمرة العطبت چبدك بيها چبد إختك تعطب
هـاك إخذ يحسين الچبد...شوف إشحرگ بيه الوجد
يبن أمي وإبگلبي تجد...جمر نار الخيم يلهب
يبن أمي هذي جثـّتك والـراس چا وين...هالنايبه إمنين
يا ريت گوم إلگطعو جسمك إمگطعيني
* * *
تبخ گلب حسين زينب چانت إبدمعة حزنها
لن إجاها السوط من إيد الرجس طگها إبمتنها
إو غصب عن جسمه إسحبوها وگطعت من حسين ظنها
وأنوت عله مفـارگ غصب...إبركز الرماح إو بالضرب
مذعوره متشوف الدرب...إو نايبات الطف عمنها
يحسين عنك غصب للشامـات ماشين...هالنايبه إمنين
مدري أباريلك عليلك لو يباريني
* * *
چني إبزينب غريبه وگطعت الظنه من أهلها
إو صدت الشاطي الفرات ودمعة العين إتهملها
وإلتهب جمر الموادع بينها وبين الكفلها
آ يالـوداع إو ساعته...بالگلب تسعر جمرته
إو زينب لخـوها نادته...العطش لعيالك چتلها
وإمخيّمك دارت عليـه الگوم صوبين...هالنايبه إمنين
نار إو نهب عگب الخدر دهري يراويني
* * *
چني إبزينب عله التل واجفه ومعلن نداها
وين جيدوم الهواشم وين المشيد لواها
گوم شوف إمخدراتك والفلك طرها وسباها
عالنهر من طاح العلم...وأسعرت نيران الخيم
چي تهجع إگلوب الحرم...والنهب صار إبحماها
من طحت يا حارس إبيوت الفاطميين...هالنايبه إمنين
مدري أحاميلك حريمك لو تحاميني
* * *
چني أسمع گمر هاشم من عله الشاطي ينادي
يختي كفّي العتب عني والعتب مرّد أفادي
وجر النار إبدليلي إي وحگ جدچ الهادي
وآنـه رهين العلگمي...إو طاحت يميني إو صارمي
والعلم يمي منرمي...إو گّصِّرَت همّة جهادي
عتبچ عله السيفه إبيمينه يالتعتبين...هالنايبه إمنين
إو سهم الگطع گلبچ گطع يسراي ويميني
* * *
إصواب البگلبچ ضهدني مثل عامود المنبه
لا عضد لا شوف عندي والعتب يصعب عليه
لون عندي إچفوف يختي چنت أحامي الفاطميه
عتبچ الگطّع چبدتي...والعمد فاضخ هامتي
بچفوفي يختي إو رگبتي...شلت حمل الغاضريه
إو سهم ألأجل گصّر هممنه يالتحشمين...هالنايبه إمنين
وألأشد من سهم ألأجل سهم الفگس عيني
* * *
لون أدري الماي هيچي عمل يعمل بالفواطم
نصبر إعله العطش چنه بس وجودك يظل سالم
هاي أسرار إو إراده إتنفذت يا گمر هاشم
سلمنه لحكام ألأمر...ناس إبچتل نـاس إبيسر
والصبر يكفينه الصبر...سدنه بيه إعله العوالم
وإللي هظمني إو فجّـر إعيون الخواتين هالنايبه إمنين
فگدك يبو فاضل هدم بيتي إو صواويني
* * *
إو چني بالعباس ناده إهنا يزينب يا غريبه
حرگ المخيم حرگني إو وجر إبگلبي لهيبه
مثل ما وجر إبگلبي جمر نيران المصيبه
والنايبات الصوبن...گلبچ تره إبگلبي مضن
إو سود الليالي فارگن...بين محبوب إو حبيبه
وإنتي تلمين إبيتامانه إو تحـرسين...هالنايبه إمنين
يختي گضه حگ العليّه إو حگ تعذريني
* * *
نادته إتهنه إبمنامك لسر گلبك وگر عينك
وألله لحميلك خواتك وأحفظ إبعيني بنينك
لاچن الگطعت گلبي شفرة الگطعت يمينك
والعمد من طر هامتك...خله إبدليلي جمرتك
ماني إختك إو حگ خوّتك...للفواطم أُوفي دينك
لسجيلك أطفالك يخويـه إبدمعة العين...هالنايبه إمنين
وألزم ثنيتك والصبر والماضي يكفيني
* * *
