إسهـام إلعلگمي إعيوني عمنها...وإجروح البگلبي وسعنها
* * *
ششل يا جـرح من إجروح گلبي...وأنه إعيوني عمت ما شوف دربي
وإعيون الحرم عالنهر تربي...مثل إدماك يجري الدمع منها
* * *
مثل دمك إدموع إعيونه إتجود...إو مجره الدمع من ضربة العامود
والفجار سهم الصوّب الجود...إو خله إعيونّه إتحارب وسنها
* * *
إهنا يالنايم إعله العلگمي گوم...إو شوف إعيونـه إلما تقبل النوم
إو شوف أرواحنه عالمشرعه إتحوم...وأذناب النوايب لسّعنها
* * *
يالمفگود شوفك فگد كل شوف...والگطّع إچفوفك گطع إچفوف
من إختك يبو فاضل والسيوف...مثل جثتك إلجثتي وزعنها
* * *
يالفگدك يعز عالفاجداتك... دگعد شوف حال إمخدراتك
إو شوف إشـأثر السوط إبخواتك...رض إضلوعها إو يبّس متنها
* * *
ما تگعد تباصرني إبممشاي...إو لا تم لي ولي إو لا حمه إو حماي
لو أدريك مترد ما ردت ماي...إو روحي العطش چاتلها لونها
* * *
أخبـرك من سگط منك علمنه...أخذنه الخوف وإتضاعف عزمنه
إو لن الخيل والنار إبخيمنه...وإسياط الخواتك لوعنها
* * *