حي شبل حيدر إو ليث إحروبها...صرخ بيها وضاگ وسع دروبها
* * *
حي أبو فاضل تعنه للحرب...إرسوم سيفه الموت يرهب كل گلب
شبه عوده إلليث چشاف الكرب...صرخ بيها وزاد روع إگلوبها
* * *
راطت إگلوب العده لمن نزل...شبل داحي الباب وإعليهم حمل
وبيمينه إيلوح عنوان ألأجل...إيصيح أنه إبن الليث داحي بوبها
* * *
إيصيح أنه إبن الليث مـأوى الكل دخيل...والد السبطين ساقي السلسبيل
وآنه بن من خدم شخصه جبرئيل...وبيده رد الشمس بعد إغروبها
* * *
حفز الميمون وإعليهم لكد...حام بيها وضيّگ إعليها الزرد
وچم عنيد إلمن لمـع سيفه شرد...چم عكوبس وسِّده إعله إتروبها
* * *
صـال وأدعاها إتهوه من السروج...عالأرض والخيل بدماها تفوج
وگوّضت فرسانها وذيچ العلوج...هاربه وما تدري وين إهروبها
* * *
ضهضب إعليها وتچنه وإرتعد...وچم عجيد إصيـاح بسربها إنفگد
خز مساميها وعله الشاطي ورد...وحصل لبنات النبي مطلوبها
* * *
ترس جـوده وغرف وأنوه إعله الشرب...وذكر چبد حسين أخيّه منعطب
رمه الماي وعالنفس گام إيخطب...إشلون أشرب والسبط معطوبها
* * *
يا نفس هوني عگب عين الحسين...إبعذب جاري الماي لا تتنعمين
وبالخيم عطشان عبدالله الجنين...وچبدته إمن العطش زاد إلهوبها
* * *
حمل جـوده وصدر من المشرعه...وشاف جيمان الكفر متجمعه
صال وأدعاها شتت بالواسعه...وحام والبر ضيّگه إعله إسروبها
* * *
بين ما يردي بصناديد الرجال... گرب حتفه وحاطت إعليه ألأنذال
گطّعو يمناه ثـّنو عالشمال...آل سفيان الفخرها إعيوبها
* * *
وبسهم للجود يا ويلي رموه...وراسه بالعامـود يا وسفه إفضخوه
سگط مرمي إعله ألأرض وتواردوه...آل اميه المنسلب محجوبها
* * *
هوه إمن الميمون وإعله الأرض طاح...والحزن مـن طيحته بالكون لاح
وكّت إعليه الصوارم وألإرماح...وصاح يحسين إجلي عني إكروبها
* * *
حضر عنده حسين إبن خير ألأنام...إنحنه ودمعه إيكت مثل كت الغمام
ناده خويه اليوم عين الما تنام...نامت وشبعت منام إهدوبها
* * *
وسهرت إبنات النبي سيد البشر...عگبك وظهـري يعباس إنكسر
والعدو إستوحدني وعليّه جسر...أمِّنت وإنزال عنها إريوبها
* * *
گوم من نومتك يا حر يا شهم...يا أسد وبعونة الباري إحتزم
إتنام وإنته بالفواطم ملتزم...وبالشدايد يالچنت مندوبها
* * *
ودعّه حسين وللمخيم گصد...إتلگّته إسكينه وگالت يا أسد
وين عمي راح گاللها إنفگد...صرخت ومن دم سچب مسچوبها
* * *
گضه ولاچن ما دره عـگبه إشصار...ولا نظر بالخيم من شبّو النار
ولا حضر ضعن الفواطم لمن سار...إبليل مظلم لچن وعره إدروبها
* * *