بكاء زينب عليها السلام
«تجليبه»
إعيوني العلگمي والدمع جاريّه...يسيل إعله العلم وإچفوف راعيّه
* * *
العين إتهيل دم إتسيل عبرتها...عله إصبيها السگط وإنطفت شمعتها
غاب الشوف عنها وسلت شحمتها...وأيام الدهر سارت لياليّه
* * *
أيام الدهر صارت ليالي السود...من طاح العلم والسهم صاب الجود
والعامود آ يا ضربة العامود...أشوف الفلك منها إنگلب عاليه
* * *
إنگلب عالي الفلك والفلك چان إيدور...حول إخدور منصوبه إبحمه المنطور
شنهو الصار أشوفن لا حمه إو لخدور...شال الخدر وإتهدمت مبانيه
* * *
مباني إخدورنا طاحت إو سرها إنباح...من غـرّب ضعنه والمگدر لاح
غدت لمخدرات إتلوج دونه أرواح...تعتب عالنهر وإتلوم شاطيه
* * *
تعاتب والعتب نار إو سناها النوح...إو سهم اللوم يخلف بالچبود إجروح
البـدن لو فگد روحه ينسلي إعله الروح...وإتراب البله إيغير معانيه
* * *
المعاني إتغيرت وإختلف وضع الحـال...وأنه زينب المني ما يلوح إخيال
عشت إمخدره واليوم خدري شال...واعيش إمخدره بستار ماضيه
* * *
وأعيش إمخدره بستار خدري الفات...لو مات ألأمل عز ألإبه ما مات
هدم بيتي عليّه هادم إللذات...نحرته بالصبر وأشگف مواضيّه
* * *
ششاجف آه من دنياي حيرتني...مراميها إبفگد ولياي صابتني
لو أشگف إسياط الوسِّمن متني...لو شفرة حچي اليگلون مسبيه
* * *
مسبيه إو عليـّه إيهــون لا ميهـون...إشلون أمشي وأعـوف إجسوم إخوتي إشلون
ششوف إمن الدروب ومالي بيها إعيون...عيوني إبكربله إو عالمشرعه إربيه
* * *
إعيوني إبكربله إو كربله الفجعتني...وأنه زينب إحجور الصبر ربتني
إو ثداي العصمه در إبحلم رضعتني...إو فكرتي إتبصرت برموز علميه
* * *
برموز العلم وإبقسمة التكوين...أجاهد مثل إخوتي الجاهدت للدين
وأگف للدين وگفه التگر عين حسين...وأخلد بالشرف آثار مرضيه
* * *
لخلد بالشرف آثار محموده...وأجاهـد مثل أخويه البذل مجهوده
لعد هالدين وأرصد بالإبه إحدوده...وأكفّ عن الدهر وأشگف مراميه
* * *
