عد زينب عباس اتچنه...گلها اليگرب حدچ فنه
* * *
بأيد السيف وبيد الرايه...يتبختر بحدود الثايه
لن زينب گبلت شچايه...ونادت يا عزنه وسور إلنه
* * *
يا ضنوة عودي يمشكر...يالبوجودك گلبي يستر
مشحون الطـف من العسكر...ما أدري الگوم اشتتمنه
* * *
عونچ يختي وعند عيونچ...هودي ولايتغير لونچ
ذوله الاجلاف ايهمونچ...لدعي الخيل انجر بالعنه
* * *
نادت زينب ميهموني بوجودك يا نور عيوني
لاچن كل خوفي ايفجعوني بيكم يافرسان الدنه
* * *
يالسيفك طاعـون الجيمه...لاچن صد يا راعي الشيمه
وشوف الاطفـال البالخيمه...تحن عالماي وتجذب ونه
* * *
يا زينب گلهـا اتشجعيني...بعيالي اشلون اتوزميني
ضنوة عودچ وتعرفيني...هالسيف استارثته منه
* * *
ذخرچ يختي وضنوة عـودچ...حي آنه وتنداس إحدودچ
افدي وجودي دون وجودچ...لوصارت للصارم رنه
* * *
نـادت ادري بك ياهيبه...حروبي ورابي ابحجر النيبه
لاچن صابت گلبي الريبه...يستر لو ما تبعد عنه
* * *
ليث ومنعوت ايعرفونك...واطفـال حسين ايوزمونك
بهذا الماي اليجري دونك...وعيالك ما تشرب منه
* * *
حفز غوجـه وطب الحرمه...رج الكون وذل اگرومه
وعن الشط سال الملزومه...طب للماي وبي متهنه
* * *