زينب والعباس عليه السلام
«حدي»
زينب لخوها هلهلت...من شافته إبحد الخيم
نادت هله وميّت هله...بالعلم وإبراعي العلم
* * *
هلهلت والمدمـع يصب...من شاهدت راعي إللوه
حياك يا ريع الگلب...يا من العين إختك ضوه
إنته الضمد والمعتمد...يا من إبخدر إخته إلتزم
* * *
إنته البخدري إتوزمت...وإنتـه الگلت لي إبشيمتي
وإنته يبو فاضل گدت...بيدك شچيمة ناگتي
من الوطن سار الضعن...إبشيمتك يا بحر الشيم
* * *
والدرب كله إمدلـله...إو تخفج عليّه رايتك
لمن وصلت إلكربله...وإنزلت بيها إبشيمتك
إنته إنصبت وإنته إضربت...أستار المخيم للحرم
* * *
والكوفه درنگها إنجمع...هسّاع أشـوف إبهالفله
إو بعد الفزع يتله الفزع...خيل إو زلم متواصله
گلي إشتود شلهم گصد...منهم تره گلبي إنلچم
* * *
جرد إبچفه صارمه...والسم يكت من شفرته
عيناچ يا بت فاطمه...ناداها وأنشر رايته
ذخرچ عـدل وإللي يصل...خيمتچ بالسيف إنجسم
* * *
أدريك يا بحر الفضل...ذاخـر شجاعة حيدره
حي إنته وإختك ما تذل...سالم يسبع الگنطره
إبسر والدك شد ساعدك...يالتفرح إبيوم الصدم
* * *
نعمين يا نعم الولي...راضعك ثـدي أُم العله
والسيف من عودك علي...ورثك إبحد المرجله
لمن سمع لخته إنتشع ماس إبوجهها وإبتسم
* * *
