زحفت عالخيام الگوم...لمن طاح حاميها
او نامت عگب عين الچان...مسهرها لياليها
* * *
ما زال العلم منشور...چان ابچف گمر عدنان
يرجف من يرف منه...گلب كل فـارس او حرّان
او كل ساعه إبسنه امن الخوف...چانت تمر عالشجعان
او تحزن من يصير الليل...وامضبطه العُدد عالخيل
وايصح بيهم التمثيل
شاة او جاعده إربيه...تخاف الذي يغزيها
* * *
تخسه من تگول اسباع...من النيص تتجفل
من تنظر گمر عدنان...سيفه ابساعده منسل
تِهَبـِط روسها منه...اوعزمها ابريب يتبدل
وإتنكـس رواياها...ابريبه وتصد عيناها
وتشاهد مناياها
تطير اگلوبـها واتشوف...صگرها إمحوم إعليها
* * *
ابعكس ما چانت الجيمـان...ما تهجع ابليل انهار
چان حسين واعياله...اوعمامه ابرغد والانصار
امخيمهم گطب واعليه...گمر هاشم فلك دوار
چالضرغام حامي الحد...وابيمناه المهند
صحيفة موت وامجرد
حتى امخدرات حسين...طيب الوسن يهنيها
* * *
اوچانت من تصد زينب...لعد عباس تتنوع
تشوفه مسفر الذرعان...بيده الرمح يتلامع
سنا نوره اووميض السيف...بريج اسهيل يتلامع
إتمِّن ما تهـاب الگوم...اوتتهنه ابلذيذ النوم
تدري به نفل جيدوم
اوشجاعـة حيدر الكرار...راعي العلم حاويها
* * *
ما زال العلم منشور...چان ابچف حليف السيف
ما چانت تظن الگوم...تاخذ من حسين الحيف
او ما چانت تظـن زينب...تشوف الضيم عگب الريف
لاچن من هـوى العباس...وانصاب ابعمد عالراس
ناده يا شديد الباس
ادركني واعتناه حسين...اضلوعه اعليه محنيها
* * *
اوثلث مرات أخذ راسه...حسين او حطـه الصدره
وابو فاضل يصد عنه...اويرد يتوسد الغبره
وينادي ياعضيدي ابجاه...جدك وأُمك الزهره
الزينب لا توديني...وعلى التربان خليني
شگلها نم تداعين
إبوعدي اوتبچي اگبالي...اوياذيني بواچيها
* * *