إستغاثة الحوراء زينب بأخيها أبي الفضل العباس عليه السلام
«بحر الطويل»
يبن أمي إنگطع گلبي...وعيني ظلت إربيّه
وين العلم وين الجود...وين إچفوف راعيه
* * *
زينب عله التـل إتصيح...لحد يا حماة الجار
علينه حرگو إخيمنه...إو بينه ما دريتو إشصار
وين إللي تطفي النار...النار وتشب النار
وين إلمـا تلمها إدروع...وين إلما تهاب إجموع
وين إلما تعرف الروع
وين إمدربة حيدر...وين التحيي ماضيّه
* * *
يهل الخيل إجتنه الخيل...وين إللي ترد الخيل
وين إللي تشد الحيل...بالحيل وتهدم الحيل
هيجو إمن الثره هيجو...حرايركم ولاها الليل
لتخلوهن إبهالحال...يالمتوسدين إرمال
نزل عدكم إو بيه إعيال
إو نزل إلما إله حمّاي...تتهدم مبانيه
* * *
شاطت للمعاره إتريد...تـدوّر جسم أخوها حسين
نوبه إتعثر نوبه إتگوم...ما تندل دربها إمنين
متگلي إشتشوف العين...لو فگدت إصبيها العين
إو ظلت بالمعـاره إتحوم...إو عالغبره تشوف إجسوم
رميّه إمغسله بدموم
والريـح إبعجاج الخيل...چفّنهم إبذاريه
* * *
إو من شافت وريد حسين...مگطوع إو يسح دمه
إنغشه إعليها إو هوت فوگه...إومن مجره إلدمه إتشمه
تگله سهم البگلبك...شعل گلب إختك إبسمه
يهل نايم عله الغبره...إو دم طبره إبأثر طبره
جسمك من سحگ صدره
إو ظهرك يا بعد عيني...ليش إضلوعه محنيه
* * *
يبن أُمي إخلصت روحي...شلي إبروحي عگب روحك
دم تتفايض إجروحي...إو مجراهن من إجروحك
نشف ريع الگلب موحه...يخويه من نشف موحك
خليني أرد أموت إوياك...ما أگدر عله فرگاك
يبن أُمي وعگب عيناك
يرميني إبسهم چتال...لو شامت يصد ليه
* * *
إو صـدت للشريعه إتصيح...عسن لا چان ردت الماي
حياتي إنعدمت وشنهي...حياتي من عگب ولياي
ردت بالماي أبرد إحشاي...جمر خله إبضمير إحشاي
العذر لله يراعي الباس...شگولن شعتذر للناس
عله الماي إفگدت عباس
ريت العلگمي لا چان...نهره ولا جره ميه
* * *
يخويه إو ضربة العـامود...حالت بينك وبيني
وسهم إللي فگس عينك...مثل عينك فگس عيني
إلگطع يسراك ويمينك...گطع يسراي ويميني
وما عالينچتل معتوب...إو گطعنه للسعاده إدروب
رضينه بالذي مكتوب
إنته إعله النهر مطروح...وأنه للشام مسبيه
* * *
