خواطر الحوراء زينب عليها السلام
«فائزي مذيل»
عالمشرعه العباس...صاب السهم عينه
أحّا يسهم العين...وإنكسر ظهر حسين
وإحنه إنگطع بينه
* * *
گابلت شاطي العلگمي إو فجر دمعها...وأحنت ضلعها
وصرخة وديعة فاطمه إبصرخة فزعها...وأحنت ضلعها
يا گمر هاشم مصرعك لختك فجعها...وأحنت ضلعها
چتال أخوك حسين...فرهد صواوينه
والسهم والعامود...گطّع إچفوف الجود
وإحنه إنگطع بينه
* * *
عباس تذكر ساعة إلبيهاه إطلعتني...وإنته إكفلتني
ما حُره مثلي إتدللت يالدللتني...وإنته إكفلتني
مكتوب لي سوط العـده إيطگني إعله متني...وإنته إكفلتني
شوف الزمان إشلون...صابت نياشينه
يالمنفجد شوفك...وإنگطعت إچفوفك
وإحنه إنگطع بينه
* * *
عباس تذكر ناگتي من جدمتها...وبيدك گدتها
فوگ الحرير إبرايتك من برگعتها...وبيدك گدتها
إو عالناگه تذكـر يا عقيله إلركّبتها...وبيدك گدتها
والكربله بحماك...يا خويه طبينه
ما چنت أظن عالماي...ينهدم سور إحماي
وإحنه إنگطع بينه
* * *
عباس فاتني ومشن بيض الليالي...كل چاره مالي
وإنطوه إبطيحت رايتك عزي ودلالي...كل چاره مالي
زينب أنه إو ما شـافت إلوادم إخيالي...كل چاره مالي
أصفن وأحـاچي الروح...وين الخدر وينه
نادتني خدرچ راح...طاح الموّزم طاح
وإحنه إنگطع بينه
* * *
چني إبطريـج العلگمي جسمه إيتگلب...صاح إعله زينب
عتبچ ضهدني إو لا تكثرين إلمعاتب...صاح إعله زينب
سبيّچ إو نيران الخيم بالگلب تلهب...صاح إعله زينب
تدرين أخوچ إشحـال...ما بينچ إو بينه
وآنه أدري بيك إشصـار...مخـّك غده طشّار
وإحنه إنگطع بينه
* * *
عتبي يبو فاضل تره والنحب والنوح...من لوجة الروح
حگ المعاتب عالعدل مو عله المذبوح...من لوجة الروح
وآنه ادري بيك إمگطع وعالشاطي مطروح...من لوجة الروح
أعتب وريد إعتاب...گلبي يسلينه
وإنته ألأجل وافاك...وإتغسلت بدماك
وإحنه إنگطع بينه
* * *
چم نايبه إلما تنحمل شفت إبزماني...زينب تراني
لاويت دهري إو لا تظن دهري لواني...زينب تراني
سهم الشمـاته فگـّس إعيوني إو عماني...زينب تراني
والشامت إبهاليوم...عُمرت دواوينه
وإشلون أطب ديوان...وإنتم عله التربان
وإحنه إنگطع بينه
* * *
