أضف الموضوع
الشاعر المرحوم الشيخ كاظم منظور الكربلائي
07/09/2019م - 11:48 ص | عدد القراء: 1979
 كاظم منظور الكربلائي
من ركب ميونه
«ميمر مذيل»
من ركب ميمونه...والغضب بعيونه
ركـّز الرايـه...إعله المسنايه
وإنحدر طاعونه...والغضب بعيونه
* * *
طلعت عقيلة حيدر إمن الصيوان...تمشي إبجلاله
شافت گمر هاشم يشع بإلإيمان...مطلع جماله
والعلم متمركز إبچف الوجدان...بإسم الكفاله
هـاك إخذ عنوانه...ضامر إو وجدانه
يالتكفلها...حارس إبظلها
ويتغطرس دونه...والغضب بعيونه
* * *
دسمع يمن بيك إغرست روح الزود...همه إو شجاعه
يالناشر إبيمناك مرصد مشهود...عصمه إو مناعه
هالعلم من دعوة محمد موجود...زم إرتفاعه
والدك وإعلومه...والذخرلك يومه
صاح أدريبه...هالعلم هيبه
خدرچ إيشيدونه...والغضب بعيونه
* * *
من سمع زينب طفح عزمه الطفاح...دمدم إو ضهضب
يرتاح خل گلبچ يا زينب يرتاح...وآنه المعتب
وفصّم إعجود الرمح من هزه إو صاح...عونچ يا زينب
بالحـرب تدريني...ما أصد عن ديني
هوّدي وهودي...يختي بوجـودي
عزّتچ مضمونه...والغضب بعيونه
* * *
وإتعلگت زينب ببن والدها...وصـاحت إبزودك
والغانمه إعيون إختك إتشاهدها...ورح إبوجودك
ما تنشد إختك طلعت إشمگصدها...مگصدها جودك
إعيالك المحجوبه...بالعطش مصيوبـه
يالتشجعيني...ماي من عيني
والحرم يردونه...والغضب بعيونه
* * *
صد أو نده يا بت محمد شوفي...حگچ عليه
إصخيلچ إبروحي وأضحي إچفوفي...بالغاضريه
وإتشوف عينچ من يصكني إبشوفي...سهم المنيه
شـوفچ إتفگدينه...دمعچ إتهلّينه
ونـه إبحگ حسين...أنذبح للدين
(والعده إيسمعونه)(1)...والغضب بعيونه
* * *
عباس يتبختر وزينب ترعاه...تتمنه منه
ومطلع گمر وجهه وتجلت معناه...خوه إو محنه
وگلبه إيتطاير فرح لمن تنخاه...وين إلمچنّه
دسمع إشناداها...وإغتنم مرضاها
يرتجز عونچ...أنذبح دونچ
(كلهم إيشوفـونه)(2)...والغضب بعيونه
* * *
شوف الأخوّه الساميه وشوف الباس...وشوف الفراسه
شوف الحراسه النشرة إعله الحراس...خيمة حراسه
من سمع زينب نادته يا عباس...صاح إبحماسه
(إبغايتي المعروفه...وهمّتي الموصـوفه)
(يختي ليهمچ...چافلچ يمچ)
(إبهمته إيهـابونه) ( 3)...والغضب عبيونه
* * *
(1)هذا المقصور من نظمنا.
(2) لا يوجد هذا المقصور وهو من نظمنا.
(3) ما بين ألأقواس الثلاثة هي من نظمنا.
|
