العباس عليه السلام رمز البطولة و الوفاء
«شيعتي»
بطل بالغاضريه...مثال العبقريه
حمل راية علي إو للمشرعه إتعنّه...ملك مـاي الفرات إو ماشرب منّه
مثال العبقريه
* * *
كل بطل حسب إقتداره يشد مسند بالبطوله
إو مسند العباس سامي يا سعد حظ الينوله
إو نشر للإسلام رايه إو نشرة إفروعه إو أصوله
وإبسِمه الشاطي ساميه...إو خزها إبملاحم داميه
إو حاملها يوم التضحيه...نصر دين الله إو رسوله
حمل تاج القياده...عله إمتون الشهاده
إو تواريـخ الفضل فضله يسجلنه...ملك ماي الفرات إو ما شرب منه
مثال العبقريه
* * *
بيَّض إوجوه القياده گمر هاشم بالقياده
إبكربله إو سجل صحيفة سعد بأقلام السعاده
إو عالقلم توفيقه يملي إو حبره من دم الشهاده
للتضحيه خلد شرف...بالإمتحانات إنعرف
إو ما مثله بالكون إنوصف...عطفه لحسين إو وداده
الشمايل هاشميه...المحاسن حيدريه
إو محاسن حيدر الحيدر يوصلنه...ملك ماي الفرات إو ما شرب منه
مثال العبقريه
* * *
إشلون نشرة علم حلوه نشر بحدود الكفاله
من تكفل خدر زينب ما گصر جهده إو نضاله
علم هز الكون علمه الموت يرجف من إخياله
بالكـون أخذ سطوه إو علم...وإيروّع إگلوب الزلم
عاش العلم خل يغتنم...إبمتن أبو فاضل حلاله
يطوف إعله الصواوين...چفيل إعيال الحسين
إو رباب إو زينب إو سكنه تلگنه...ملك ماي الفـرات إو ماشرب منه
مثال العبقريه
* * *
إشلون ملگه إشلون وگفه بين مكفول إو كفيله
والعتب صار إيتناگل والدمع فجر مسيله
وإبطرف راية وليها إتعلگت روح العقيله
صاحت يفاروق الفضل...إدرك حـرم سيد الرسل
شوف الرباب إعله الطفل...تون والونه ثجيله
يزينب يا ضـوه العين...دگليلي إشتريدين
وركز عدها الرمح وإبحده يتچنه...ملك ماي الفرات إوماشرب منه
مثال العبقريه
* * *
عونچ إو عيناچ يختي صاح أنه بدر الهواشم
خل يلزمون الشريعه تنضح إلماي الصوارم
للخيم ردي يزينب أمّني إگلوب الفواطم
لا تخليها إموجله...خلها إبوجودي إمدلـله
وإبحدهن المـوت إيحله...واليموت إبشرف غانم
مشه إبأمر الوديعه...إو توجه للشريعه
إو لبس درع الوفه إو سيفه الوفه الجُنه...ملك ما الفـرات إو ماشرب منه
مثال العبقريه
* * *
ساگ غيم العالشرايع واليسوگ الغيم صعصع
والبريج إيخطف عين الكون والسيف إيتلامع
گمر بموسط الشاطي نزل والنور إيتشعشع
ظامي إو دليله منعطب...من غرف من ماي العذب
شِمْنَعَه إو عيَّه إمن الشرب...من وعد سكنه تمنع
رمه الماي إبكرامه...إو يخاف إمن الملامه
عذل نفسه إو مواعيده يعذلنه...ملك ماي الفرات إو ما شرب منه
مثال العبقريه
* * *
حمل جوده إو صدر ظامي الگلب حماي الضعينه
عارضه سيف المگدر گطع يسراه إو يمينه
إو بالعمود إنفضخ راسه من توله السهم عينه
كل المواضي الصابته...عن الخيم ما منعته
وألأجل نفذ رادته...بين المخيم إو بينه
إنگطع أصـل السقايه...إو غفت عين الرعايه
يگلبي حن عله إمصاب إليفگدنه...ملك ماي الفرات إو ما شربه منه
مثال العبقريه
* * *
