موقف رملة أُم القاسم عليهما السلام
«إهجيني»
شوف أُمك إبيـا حاله...يمعذب الخياله
والعرس ذب إثيابه...وإرباك صفي إحسابه
يمعذب الخياله
* * *
يبني إفرشتلك گلبي...إو وسدتك إعله إچلايه
وإبچبدتي غطيتك
إو ناظر دليلي يربي...ليك إو يشوف إربايه
إبلب الچبد ربيتك
من فضل نعمة ربي...رويتك إمن إدمايه
وإمهجتي غذيتك
إبطـي الگلب لفيتك...بين الضلوع أخفيتك
وإهواي إلك طلاّبه وإرباك صفي إحسابه
يمعذب الخياله
* * *
مرتع دليلي إو ملعب...چان إلك يا قداحه
وإمحافظك لا تذبل
وإهروش گلبي تسحب...من مهجتي إو نضّاحه
إبثغرك رحيق إوسلسل
إو گلبي إكفلك وإتأهب...إو مدلك بساط الراحه
وإيدلـلك يمدلل
وإحسبت تسعه إو تسعه...إو ضاگت عليه الوسعه
من الحمـل وأصعابه...وإرباك صفي إحسابه
يمعذب الخياله
* * *
كل هالتعب عانيته...إو عين الوداد إبيّضت
يبني وراعي شانك
إو عهـد الحمل گضيته...إو ساعة الشده إنفضت
حتى إوضعت وجدانك
إوبيك الحجـر هنيته...إو روضة حياتي زهرت
إو فتش ورد عنوانك
أغمض وأفز وأتفگدك...إو تنجذب روحي إلمهدك
يالشوفتك جذابه...وإرباك صفي إحسابه
يمعذب الخياله
* * *
ضعفت گواي إو حيلي...من سهرك إو حسباتك
إو سباح گلبي إتمرد
وأحسب نهاري إو ليلي...إبأيامك إو ساعاتك
إو بيك إوصلت هذا الحد
وإشنيّتك دحچيلي...وي عمك إو عمّاتك
مجهود إلك يتشاهد
إو لو حشمك ثـدي أُمك...هاللّةٍ هاللّه إبعمك
عينـاك رد إجوابه...وإرباك صفي إحسابه
يمعذب الخياله
* * *
والتذخر إلها إمرتب...مثلك يشمعة عيني
متظل تجر الحسره
جمرة دليلي تلهب...من كربله تدريني
طفيلي يبني الجمره
لو گصرت تتعتب...عن دينك إو عن ديني
وإدرك إلعمك أمره
شد يبني عالملزومه...واليعزم إعله الحـومه
دم الوريد إخضابه...وإرباك صفي إحسابه
يمعذب الخياله
* * *
صد الولد وإتبسم...إبوجه التريد إرباها
طيب إللبن والمرضع
ناداها ليهمچ هم...غاياتچ إو مغزاها
من حگهن إبنچ يطلع
لأسبحلچ إبّحر الدم...خل روحچ إو منواها
إتحاسبني عند المصرع
صاحت إتهنه إتهنه...يالمجبل إعله الجنه
ضمد الگلبي لإصوابه...وإرباك صفي إحسابه
يمعذب الخياله
* * *
حـاس إو بسم وإتغطرس...وإبعونة ألله إتدرع
إو شد بالرساله أركانه
إبوجهه الحرب من عسعس...نور العقيده إتشعشع
من جوهرة إيمانه
إو صـاح الوفه اليوم إو بس...إبدم الوريد أتبرع
للدين والديانه
صاحت يالموافيني...دخذ الضوه من عيني
إو خل دمعتي سچايه...وإرباك صفي إحسابه
يمعذب الخياله
* * *
