قل لا أسألكم أجرا إلا المودة في القربى
الأمة أدتلك عوض تعبك أجر...يبو الزهرة بيوم عاشور الظهر
الأمه أدتلك عوض تعبك أجور...عاشر بعاشور لعبة خوش دور
خيل تسحك عاليتامه وعالصدور...وخيل تهجم عالخدر بالحجي المر
وانت حاضر يالنبي بوادي الطفوف...وتدري بالصار وجره وعينك تشوف
خيل وسياط وحريق وضمه وخوف...والحريم اتجول من كتر الكتر
امتك جازتك يا سيد الأنام...سياطهم تلعب على روس الايتام
والخيام انجان تنشد عالخيام...مو خيم يا المصطفى صارت جمر
من أمتك هذا الجره يالمصطفه...خدرك بطف كربله وج ونطفه
يبو الزهره وهاي ساعات الوفه...بدت من طاح أبو اليمه من المهر
يبو الزهره وبعد من جلجل الليل...وخمد صوت المعركة وقلت الخيل
والعقيلة اطلعت مهدومة الحيل...خاوية ومنها انهدم ركن الصبر
خاوية وتسحق على جمر الخيم...والدموع من ادليل تسيل دم
اشلون تقدر تجمع أطفال وحرم...الفاجدة والحايرة وليلة ذعر
ابليل هدعش وشلون انقضه...عاليتامه اوعالحرم ضاك الفضه
بالاحزان تصيح بت المرتضه...خايفه من الفجر لاطر الفجر
فجر لا طر يالنبي اولاح الصباح...وجابوا الهزل وحادي النوق صاح
نريد للكوفه وصدق للكوفه راح...وآنه رحت ميسره وي أهل الغدر
الحال ما يخفاك يا سيد الوره...ميسره وحسين أخوي اعله الثره
بالشمس وعظام صدره مكسره...والموادع صار بدموع الحمر
يالنبي هذا الجره من أمتك...جازتك ما كصرت من جازتك
لا كتابك حفظته ولا عترتك...وعكس ما وصيتهم صار الأمر
