الحسين يستجير بالبيت الأعظم
نزلو آل غالب والسفر تم...اوحط اوجاورو بيت الله الأعظم
تم احسين متحيَّر ابأمره...اوعليه الكتب ليل انهار تتره
حته اجتمع رايه اوصار فكره...يودي مسلم الليث المشيَّم
كتب مكتوب اله الخلص الشيعه...مسلم جايكم يأخذ البيعه
اليطيع أمري الأمر مسلم يطيعه...واليعصيه يخسر و يتنَّدم
اوصيكم اوطيعوني ابوصيتي...ثنية مسلم ابحيكم ثنيتي
بعثت الكم العمده امن اهل بيتي...اوجبير أولاد عمي اومنهم أعلم
نده مسلم اوگله اگصد الكوفه...اوكاتبني ابكل اللي تشوفه
امتثل لمره اوحب مسلم اجفوفه...اوجرت دمعة احسين عليه و أكظَّم
أخذ وياه دليل اوسار ليهم...اوحيَّو بي اوگام ايحيي بيهم
اهلال العيد جنه اوهل عليهم...اوكشف عنهم اغيوم الحزن والهم
گاموا يعتنوا ويبايعونه...اوعن احسين وأهله ايسايلونه
يمسلم دكتبلهم خل يجونه...صبر عدنه اعله فرگه حسين ماتم
كتب مسلم اومنه الگلب مستر...يبو السجاد عجلِّ لا تأخر
الك ميت الف سيف اوبلجن أكثر...تحن حن الفصيل اعليك وأعظم
وصل مكتوب مسلم لبو اليمه...گراه اوشكر سعوان ابن عمه
نده عباس أخوه اوگرب يمه...گله اسرع اوللممشه تولم
روح ابساع شد اضعون العيال...حته انسير للكوفه اعله كل حال
بدّل حجته ابعمره اونوه اوشال...اوحل احرامه اوعالسفر عزّم
كلمن سمع يتعجب اوينشد...ليش احسين يوم التروية ايشد
لفه محمد يصيح اشسبب مبعد...يمن بيك المناسك والفرض تم
ناداه اطلعت غصبن عليه...يخويه ضاعن امن اشرار أميه
أخافن يقتلوني ابها الثنية...اوحرمه ما تظل للبيت الأعظم
يمحمد لفاني الحين جدي...وآمرني ابمسيري اوبذل جهدي
عهد منطي وأريد اوفي ابعهدي...يخويه والوفه اعله الحر تحتم
ناداه ابدمع كالسيل ساجم...يخويه ابها الخطر ما دام عالم
ليش اوياك ماخذ هالفواطم...أخافنها العداك اتصير مغنم
يقله والدمع ليلو ايتحدر...عهد منطي يخويه ابعالم الذر
آنه انجتل وعيالي اتيسر...اوصدري ابخيل عدواني ايتهشم
جذب حسره اعله أخيه اوصفق بيده...اوفك باعه اوغده ايودع عضيده
يشم قلبه او يحب صدره او وريده...أورد للدار محني الظهر مغتم
