سواد العين فـاض ونشف مايه...عله إللي نزل للميدان مايه
إسم ألله يا إوليدي عسن مايه...الكدر ليك وترد محروس إليه
* * *
يهل شايل عزيز الروح وانه...إودعنه وجر إعليه وانه
منه إسهرت الليالي إعليه وانه...الكسرني الدهر بأرض الغاضريه
* * *
إصبي العين متلولح وناراه...وذهب من ناظري ضيه وناراه
بگلبي ظلت الونه وناراه...إحمست چبدي وأجر ونه خفيه
* * *
جمـر العطش بگليبي شبابه...عله إللي منحرم لذة شبابه
يمدونه عله الغبره شبابه...إنگطع منه الوصل وإنگطع بيه
* * *
يالأكبر هاك إخذ گلبي وراعه...يبني وإدرع إبصبره وراعه
وإخذ الماي من چبدي وراعه...إتغذه إبمهجتي إو شد عالمنيه
* * *
إصبي عيني هوه إمن العين وأبراح...شباب إو ما تهنه إبثمر وإبـراح
أصك وجهي إبراح إعليك وإبراح...أمش عن وجهك إدموم المنيه
* * *
يمن للمصطفـه زهـره وعينـه...إمصابـك صـاب دلالي وعينـه
يالأكبر گـلبي يتگطـع وعينـه...عمـه بسهـام وادي الغـاضريه
* * *
يشمامة حسين إو روح إله إو روح...مانـي أمك وگلك للحرب روح
وخذ وياك گلب أمك وإخذ روح...وأنه روح الصبر تنمزج بيه
* * *
