ليلى تحشم ولدها
«تجليبه»
ماني أُمك وأحشمك يولدي دسمع...شد عالخيل وإخذ الخيل يالأنزع
* * *
شد عالخيل وإبنخواي صدرها...وإصگور الزلم بالكون صگرها
زرها إبرمحك إو بالسيف طشرها...والرمّاح يجني الرمح المشلع
* * *
شلع شوسها إو خطيّه الشلاع...والسياف سيفه بالحرب گطاع
روس الروس وإيبشطه إبروس إسباع...إو خل عسالك إبگلب الحرب يرتع
* * *
خل رمحك إبگلب الكون يتثنه...إو چفك من وشيل السيف يتحنه
إو لو صدلك الدرنگ لا تصد عنه...إو خل درع الحرب بالسيف يتهزع
* * *
هز إدروعها إو گطع محازمها...إو فصل إجسومها وإحصد جماجمها
دك إجبالها وإنسف ملازمها...إو مثل حيدر يالأكبر بالوغه إتشيع
* * *
مثل حيدر تشيع وإخذ يبني إعلوم...وإطفي جمر البگلبي إبسيل إدموم
برباك إتعبت يبني وأريد اليوم...تگر بالسيف عيني إو ترضي المرضع
* * *
والمرضع يالأكبر عالرضع منّه...إله حگ إويريد إبزوده يتهنه
وإبساعة الشده إگباله يتچنه...إو من يسمع الرضاعه إندهت يفزع
* * *
إفزع والفزع حگ واجب إو مرسوم...إو چيف أنسه الثدي الغذاني بالمقسوم
وإمن الحاربت برباي لذة النوم...إشلون أصبر وأشوف إعيونها تدمع
* * *
لا تدمع إعيونچ حشمي إبتهليل...إبحجر سجيل أدمرلچ أصحاب الفيل
وأصرخ بالحرايب صرخة إسرافيل...وخلي أرواحها من أجداثها تطلع
* * *
لطلع أرواحها إو روحچ لهنيها...إو قدسية محمد يمي شوفيها
إوتكبيري عله ساعه إو تسمعيها...إو خل عينچ تشوف الكون يتزعزع
* * *
يتزعزع الكون إبصيحتي إو ملگاي...وإبصحف الشهاده سجلت مثواي
وأريد أفدي الديانه إبمهجتي إو بدماي...إو صاحت روح يبني إبألله إمودع
* * *
روح إوهاي روحي إوياك والراحه...وإخذ گلبي يذب عنك إبمفتاحه
وذب إعله الدرع چبدي إو سباحهإو خله إوياك بالميدان يتگطع
* * *
