وحيد ليلى
«ميمر مذيل»
يا نور عيني إو يا شباب الجنه...يبني يالأكبر
إبشمعة شبابك يا شباب إتهنه...يبني يالأكبر
* * *
من نبط عرج الهاشمي إو صر عالكون...يطويه الأكبر
شمر إسم ألله إو ما ينحره المسكون...هاشمي إو شمّر
لن سمع ليله إتنادي يوليدي إبهون...خل گلبي يستر
حل الوداع إو للوداع أتأنه...يبني يالأكبر
* * *
خليني أودعك وآنه أجدِّم لامات...حربك وأحرمك
يبني أريدك تجبل إعله الرايات...مدرع إبعزمك
وآنه ألأشد لك عالمهر للغارات...وللسيف أسلمك
بس شوف گلبي إشرايد إو يتمنه...يبني يالأكبر
* * *
يبني أرد أخبرك وأشتچي لك حالي...ويشهد لي ربي
بأيام حملك ترتع إبدلالي...وتمرح إبگلبي
إو يوم الوضعتك بي تره چتالي...وإذخرت تعبي
ظن بيك گلبي ولا تخيب ظنّه...يبني يالأكبر
* * *
من عگب حملك يولدي إبجمر إرباك...ذابت مهجتي
يبني وأهز بيك المهد وأترجاك...تحفظ كبرتي
عالبال ذچرك يا علي وچيف أنساك...وإنته سلوتي
رجـواي بيك إشلون أأيّس منه...يبني يالأكبر
* * *
ساهرت ليلي إو ظنتي إتوافيني...إبسهر الليالي
مـولحت عيني وأطلب إبضي عيني...وأطلب دلالي
مدلول يبني ردتك إتباريني...وتحسن بحالي
لو صحت يبني النخوتي تتچنه...يبني يالأكبر
* * *
صد الولد لمّه إو نده عد عيناچ...ضنوتـچ دونچ
ميضيع تعبچ والربه إو حگ إرباچ...لنذبح دونچ
من عگب عيني عين ربچ تربيچ...خل يفجعونچ
نـادت عگب عينك سلوتي الونه...يبني يالأكبر
* * *
يوليدي شوف الگدر شجره وياي...وإشعمل بيـه
ردتك تمددني إو تگطر لي الماي...عند المنيه
ما چان ظني يومك إيصيب إحشاي...بالغاضريه
وإسهام فگدك للچبد صابنه...يبني يألأكبر
* * *
