فراسة علي ألأكبر عليه السلام
«ميمر مذيل»
حربيه حربيه...صـدّر الحربيه
من زم ألأكبر رايته...إو صدر الحربيه
* * *
من زم ألأكبر رايته إوشد السيف...ساعـده إو زوده
إو نصف الدرنگ بالمهند تنصيف...وأبرز إشهوده
والسيف للسياف شاهد تعريف...يعلن وجوده
راعيه راعيه...والسيف راعيه
يظهر معاجز طبرته...إو صدر الحربيه
* * *
شد عالمهر والمهر شد إعله الخيل...عزم المفارس
غطهـا إو تفرسها إو نشب بيها الويل...يوم المداهس
والسيف يتجادح بريج إمن إسهيل...صل ميتلامس
ماضيّه ماضيّه...مشهود ماشيه
إو خطف ألأرواح إبشفرته...إو صدر الحربيه
* * *
والمهر لو همهم إو دمدم غضبان...بالحومه زمجر
وإتفرس إبخياله گلب الميدان...خياله ألأكبر
والسيف ينهي إو يامر إعله الشجعان...يإسم إبن حيدر
مدميه مدميه...بجـروح مدميه
شوه منـاظر گبلته...إوصدر الحربيه
* * *
من سيف ألأكبر والمهر والمياد...چان إيتموع
إبطف كربله إو بالكوفه گلب إبن إزياد...منه إيتروع
نعم الفته إو ما نگص حربه إو لا زاد...عن حرب الأنزع
مبنيه مبنيه...للديـن مبنيه
حيـدر وألأكبر نيته...إو صدر الحربيه
* * *
هذا الفته إلبيه الضماير ترتاح...وإينفس الهم
من گوس حيدر نفذ سهمه الجراح...وإيفجر الدم
لو صاح يخرس كل عجيد إوصياح...يوم المناهم
صافيـه صافيه...لحسين صافيه
إو يخبط الكون إبصيحته...إو صدر الحربيه
* * *
ساعده إو سيفه إو رايته المنصوره...إو نيته البنـاها
ناتجها للدين إو بنت دستوره...من مبتداها
إو بالحسن ماخذ من محمد صوره...عالي ضحاها
مرويه مرويه...وأخبـاره مرويه
هيبتة محمد هيبته...إو صدر الحربيه
* * *
جهد الولد للوالد إيگر العين...لو بي ثماره
يتضمن إشما ضمن عـوده إعله الدين...وإشبنه إبداره
إعتبر نحر ألأكبر إبحد حسين...دمه إيتجاره
دينيه دينيه...تضحيـه دينيه
سبط الرسـول إو ضنوته...إو صدر الحربيه
* * *
