شجاعة علي ألأكبر عليه السلام
«ميمر»
من لاح مهره ألأكبـر...بالسيف يشبه حيدر
چنه محمد من تشعشع نوره
* * *
من شال ألأكبر من جبينه استاره...مثـّل محمد بإبتهاج أنواره
ومثّل علي إبفن الحرب وأسراره
للحسن مثّل جوده...ولحسين مثّل زوده
ومثل بني هاشم عله كل صوره
* * *
لا باس لو مثل محمد بالنور...مثلهم الباري إبكتابه المسطور
وإبسورة النور إقره شوف إشمذكور
وهناك تلگي الغايه...فسّر معاني ألآيه
نورٍ عله نور إبطن هالسوره
* * *
يا حي علي ومثّل علي إلما يفزع...بالكون لو كبّر الكون إتزعزع
إشما يجدح الصارم إبوجهه إتشعشع
والقم سجل يومه...يرفع الراس إعلومه
ظلت إبتاريخ العرب مذكوره
* * *
بحر الحسن عالناس بالجود إيسيل...وظل ينضرب بيه المثل جيلٍ جيل
ومن مثّله ألأكبر كفو إبهالتمثيل
وحش الفله إبحـد سيفه...والطير أمسه إيضيفه
ودار الضيافه إبكربله معموره
* * *
لحسين بالميدان مثل زوده...وزود الولد من زود جده وعوده
وحسين للمله بذل مجهوده
وألأكبـر إبهالنيه...تم ينذچر ماضيه
ومحموده ظلت نيته ومشكوره
* * *
مثل گمر هاشم وسـار إبرايه...وصاحب الرايه النكّست كل رايه
غير الوفه ما چان إله كل غايه
وألأكبر إبهالهمه...حاز الوفه من عمه
وروح الوفه إبعباس مو منكوره
* * *
لو مثل إشبـول الهواشم نعمين...شبه النبي وجده علي وعوده حسين
بسيوف هاشم گامت أركان الدين
وألأكبر إبمجهوده...للدين حامه إحدوده
لاچن غدر سهم الدهر وإگصوره
* * *
وسيف المگدّر جسم راسه إبطبره...حس إبمنيته من تدارك أمره
ظن بالمهر يحميه وأشبگ مهره
والمهر فر بألأكبر...أوچب إبوسط العسكر
وعالأكبر العسكر گلب كل جوره
* * *
طبره إعله طبره وحربـه تنحر حربه...من المواضي شبچ زور إبگلبه
وعيون ألأكبر عالخيم تتربه
يحسين بويه ينادي...إدرك شبيه الهادي
بشوفتك وإطفي مهجتي المجموره
* * *
مسرع لفه حسين وتخوصر عنده...شـاف العده إمگطعين لبة چبده
تمدد إبطوله ولمس خده إبخده
فاضت دمـوع إعيونه...لبنه وتغير لونه
وگام إيتمثل هامته المطبوره
* * *
ليله إبخدرها جاعده إو تترباه...سالم يرد إلهـا وتفوز إبمعناه
جابو عمامه وأطلعت تتلگاه
شافـت گلبها إمگطع...صاحت إو فاض المدمع
مكتوبه يبني كون أظل مكسوره
* * *
يبني إتعبت ليلي وسهرته وياك...إبيَّضت إعيوني حته كملت معناك
ردتك إمچنه وأستچن إبذرواك
ما ضـاع سهري وتعبي...سعيي إنشكر عد ربي
بيضت وجهي وهاي إلك مذخوره
* * *
