لو نويت تروح...قلبي وين ايروح
لو صدق لا سامح الله و فارقتني
يالوداعك آه...أسألك بالله
زينب اني لو جبل واقف شفتني
مع السلامة لو قلت...إحسبني من باجر متت
لو نويت تروح
لقائي ، و لقائك سكتة بيه كل شي حجينه
فهمنه ، بعضنه بالدمع لمن بجينه
قلت لك ، قريبة خيولهم صارت علينه
قلت لي ، وعد مكتوب يا خوية اشبدينه
صرت أشوف الليل...جن سنابك خيل
تسحق بصدري و تفوت الساعة لحظة
يمشي ليل الموت...اسرع من الصوت
ليلة وداع الحبايب جنها ومضة
يا موتي ليش استعجلت...احسبني من باجر متت
لو نويت تروح
وقفنه ، بوداعك و الزمن ويانه واقف
و رجفنه ، و رجف حتى الكلام اعله الشفايف
صباحاً ، قلت لي تنجفي ادلال المضايف
و سألتك ، يا خوية بيا متن للسوط اشاقف
واسمع من الغير...مو صباح الخير
شامت يقلي البقية في حياتج
و عرشي راح وياك...و اسمع بلياك
عرشج الهزلة الاميرة مو صفاتج
و اني اميرتهم جنت...احسبني من باجر متت
لو نويت تروح
سكتنه ، يا خوية و جرحك يسولف و اسمعه
يقلي ، نهارج مو سهل حضريله دمعه
امن اشوفك ، صدر و الخيل و الدنيا اعله ضلعه
و حقك ، انا و الخيمة نوقع فرد وقعه
توقع سنيني...دمعة من عيني
حزنك يلفني جرح فوقاه عباية
لا على بختك...لا يا بعد اختك
ما يلوق اويه الخدر ثوب السبايه
و بجالك آني تدللت...احسبني من باجر متت
لو نويت تروح
أحاول ، يخوية و ما يصح بيدي و امنعك
ولاني ، مقاتل حتى للميدان اتبعك
منونك ، أقدمه اشلون تقبلها و اودعك
و أنا ادري ، جوادك ياخذك بسما يرجعك
من قلت رايح...مني شي طايح
دورت قلبي و لقيته مني واقع
والله ما ادري...احترق صدري
وإلا دخان الخيم من صدري طالع
حته بكلام اتعثرت...احسبني من باجر متت
لو نويت تروح
منيتي ، و منيتك باجر تشاهدها عيني
شمرهم ، يذبحك و اني يذبحني حنيني
و اشوفك ، تقوم و تعثر تحاول تجيني
وصوارم ، أَسِنه و نار ما بينك و بيني
انت زينب وين...و اني وين حسين
باجر نردد سوا لحظة منية
و اختك تعاتب...و نحرك يجاوب
انذبح شاء القدر و انت سبية
ما اعرف اني اشجاوبت...احسبني من باجر متت
لو نويت تروح
أسالك ، يخوية و خايفة بس لا اعذبك
دقلي ، بمكاني لو صرت شيسوي قلبك
أعاين ، و أعدد للشمر كلما يضربك
و أشوفه ، يجر سيفه و على وجهك يقلبك
يرفسك بظهرك...من يحز نحرك
قل هو الله أحد دمعتها تجري
تصرخ جروحي...و الصده ابروحي
عوف اخوية و هاي أنا اقطع لي نحري
ما جنه يسمع من صحت...احسبني من باجر متت
لو نويت تروح
