زعيم ألأنصار حبيب ألأسدي
«ميمر مذيل»
محله الفراسه...ساعات المنيه
هز رايته وحشم حبيب إبگومه...ساعات المنيه
* * *
من لاح إبن ظـاهر إبظهر الميمون...چالگمر شع نوره
وهز اللوه وإهتزت أركان الكون...وراطت المعموره
وهاجت الصفوه العالديانه يموتون...إبهمة المشكوره
بذلو هممهم...ساعات المنيه
وتحاشمو يردون وجه الحومه...ساعات المنيه
* * *
عيناك نادو يالتحشم عيناك...يا حبيب إتبشر
للفلك خل يصعد لوانه إبيمناك...للمچارم مصدر
إبدار الخلد ساعه إو تجدنه نتناك...والوعد عالكوثر
يسجينه حيدر...ساعات المنيه
من عگب ما نسجي الحرب محتومه...ساعات المنيه
* * *
إحنه النشّب نار الوغه ونطفيها...ونشب نار الطافي
ونخبط الكوفه ونغتنم صافيها...للحسين الصافي
وأرواحنه بحد زينب إنضحيها...وللعهود إنوافي
نمضـي إبعهدنه...ساعات المنيه
وإنأدي لحگوگ الوفـه مرسومه...ساعات المنيه
* * *
حورب حبيب إو صاح يسباع الكون...بالوغه إو طبتّها
وياي أريدن للحرم تتعنون...خل نرد لهفتها
وبوجه زينب يخوتي تتچنون...وننتخي النخوتها
وإنـأدي حگها...ساعات المنيه
ونبري ذممنه البالوفـه محكومه...ساعات المنيه
* * *
نادوه عونك وألله لنگرلك عين...يا زعيم الرايه
وإتوجهو عالدين فرسان الدين...والديانه الغايه
كبّرو من وصلـو صواوين حسين...وإگلطو عالثايه
حياهم ألله...ساعات المنيه
وهاجت إسبـاع البالخدر ملزومه...ساعات المنيه
* * *
محله الخـدر محله الفزع والحراس...والحمه إبحرّاسه
هاشم ورايتها إبيمين العباس...للعزم نبراسه
لا باس لو صاح الموزّم لا باس...والمصيّت باسه
چنها تدانت...ساعات المنيه
إشعدها ألأنصار وگامت إبهالگومه...ساعات المنيه
* * *
نادوه يا ضنوة علي متعنيك...نغتنم من جودك
ندريك ملزوم إبخواتك ندريك...ما تِذِّل بوجودك
لاچن يبو فاضل گصدنه إنواسيك...وإنتچنه إبزودك
نرضي الصوارم...ساعات المنيه
وإنسر گلب بت فـاطمه المظلومه...ساعات المنيه
* * *
ونگلتهم إجدام الشرف والوجدان...وللجهاد إتخوضه
ومرابع ترابعو حد الصيوان...وأدّو المفروضه
چالعين دارو والعقيله ألإنسان...بالجفن محفوظه
محله الملازم...ساعات المنيه
محله الحرس محله الگعد ملزومه...ساعات المنيه
* * *
يا محله صيحتهم يزينب عيناچ...يا وديعة حيدر
نار الصوارم تلفح إو جوه إعداچ...وبالضماير تسعر
والسمر تتمركز إبصدر اليدناچ...والنصل تتكسر
مهوانه حدچ...ساعات المنيه
والموت يتقدس إبحدچ يومه...ساعات المنيه
* * *
