حبيب وألأنصار
«تجليبه»
سجل راية ألأنصار ماضيها...إبتاريخ القياده إو قلم راعيها
* * *
القلم همة حبيب إو كربله القرطاس...وإلدم الحبر والكاتب النوماس
الرايه إمهلهله إو لو هلهلت لا باس...إبن ظاهر نشرها وإلتزم بيها
* * *
نشر راية الدين إو صاح يهل الدين... شهادتكم دنت يالبيها موعودين
عهدنه إبكربله من ساعة التكوين... إو خبطنه أيامنه واليوم صافيها
* * *
خبطنه أيامنه وإندوّر المكنون ... إو عله ردن الوعد ما غمضت إلنه إعيون
يبن ظاهر يهون ألأمر وألله إيهون... نشب النار بالنار إو نطفيها
* * *
نطفي النار بالنار إو نشب النار... إشما راد الفلك يندار خل يندار
بدر وإحنين إلها أنصار وإحنه أنصار... وآثار الحيت هالدين نحييها
* * *
نحيي آثارهم وإنعيد ذاك الزود... محمد كوّن الإسلام بالمجهود
إو ريحانة محد هالعصر موجود... وإبوجه الرساله إتشع معانيها
* * *
رسالة نور تتشعشع إبوجه حسين ... بيها إبعالم ألأرواح متبلغين
إبذممنه طوگ ظلت وإحنه مطلوبين... كون إبكربله للذمم نوفيها
* * *
كون إبكربله يتخلص إلمطلوب... الشهاده إنكتبت إو ما ينمحي المكتوب
إو يتهنه الحبيب إبشوفة المحبوب... إو هاي أرواحنه إشتاگت الباريها
* * *
