حشم حبيب إبگومه...يردون وجـه الحومه
لن گمر هاشم صاح إلي مذخوره
* * *
حورب حبيب وصارمه يگطر دم...وينادي وين التجلي عن گلبي الهم
وين التحجل خيلها ابفيض الدم
نـادوه عونك عونك...والله نگر اعيونك
يا صاحب الرايه العلت منصوره
* * *
عونك يمير اليامن ابحده الجـار...بالحرب نطفي نار ونهيج نار
للدنيا عفنه والحلايل والدار
برواحنـه الموجوده...للدين نحمي اوجوده
ولحسين روح ارواحنه مأجوره
* * *
حد رادتي گبل الهواشم ينصار...لو اصبحت والفلك بالكون اندار
وجه الحرب النه ونزم بي شنيار
واحنه رجال النيبه...والموت عيب إنهيبه
نهجم على الموت اونفوج ابحوره
* * *
واستبشر وبشرهم ابطاري الموت...ما بين ميخاطب اصحابـه المنعوت
لن گمر هاشم صاح آنه امبلم الحوت
هز ابيساره الرايـه...بيمناه سيفه الآيه
يجدح شراره والوجه شع نوره
* * *
ناداهم ابن الميتجفل جـاره...من يطفح الموت ويكت مدراره
هاشم توج ناره وتخمد ناره
عند الحمايل عاده...تگوم بحملها الساده
والحرب متذب عالمفزع جوره
* * *
وتعايه عباس وحبيب المغوار...وتعنوا السبط الرسول المختار
غايتهم ايشورون ابن حامي الجار
كل فرد نيته ابصدره...لحسين سلم امره
ونلبس اشما فصل ونمشي ابشوره
* * *
اتوجهو دونه والمشكر عباس...ناده يابن عودي صعب كسر الباس
من تجدم انصارك يگولون الناس
چا وين همة هاشم...الرضعت بثدي الصارم
والها إلشجاعه امفصله ابكل صوره
* * *
ناده حبيب احنه يبو اليمه ضيف...عدم وطيب زادنه طعم السيف
وانتو الرجه ويخيب ظني هالچيف
وانتم ارباب الرحمه...واختصت ابها الأمه
من الله وانتم نعمته المشكوره
* * *
صد الحسين الگمر هاشم ناده...چى نعتذر من الگصدنه اگصاده
وعند الحمايل يا مشكر عاده
الوفـد من تلفيها...تنول الذي تبغيها
وما ترد منها اگلوبها مكسوره
* * *
يگله الحرب انصارك ايريدونه...والحمل لويثگل هله ايشيلونه
ما ينتسب عالفازع ايذبونه
عالحمل اهلـه يفزعون...ومن يشبچ ابيوم الكون
زور المواضي هاشم اتطر زوره
* * *
ناده ابواليمه ياعجيد الرايه...خل تبلغ اضيوف اللفتنه الغايه
وهاشم تظل ملزومه دون الثايه
ضيـوف اعتنتنه إعنايه...إبشر يحامي الثايه
الكل بالشهاده وخل تظل مسروره
* * *