يتسابقون إلى الموت
«شيعتي»
حشم بألأنصـار...حبيب ورادته
يسبگ الفرقه الهاشميه...يوم المنيه
* * *
زم لوه ألإيمان بيد السالمت چف الديانه
وصاح يرباب العهود اليوم تسليم ألأمانه
حيته ولبته گلوب إلما روت ماي الخيانه
طـارت فرح وإستبشرت...من بالوفاء إتعطرت
وبصوت إيمان إصرخت
عيناك عيناك...يفـاروق العلم
وياك وياك...يجوهرة الشيم
تمضي إبعهود الغـاضريه...يوم المنيه
* * *
بين ما رادت أنصار الدين تتفاده الغوالب
ولن گمر هاشم تجله وحافّه بأُفقه الكواكب
إشلون نهضه إشلون مشيه إشلون حنيّة گرايب
متذب عله المفـزع حمل...بظلها المفزّع يستظل
بحد الصوارم تبتهل
وسدّر للأنصار...لعد هاشم گمر
ويصيح ما صـار...بالكون وسدر
تسبق بني هاشم سريه...يوم المنيه
* * *
گلط جيدومة عمامه وگام بالممشه إيتبختر
وصاح ضرب السيف إلنه ورث من الفتح خيبر
وصد حبيب إعله الهواشم ومن إبو فاضل تعذّر
بيكم يسادتنه المظن...وإلكم ميادين المُضن
لاچنه هاجرنه الوطن
وطلگنه ألأحبـاب...والدنيه سوه
ونمـد إلإرگاب...إبحومة نينوه
بحدود خدر الفاطميه...يوم المنيه
* * *
سجل التاريخ موقف للأنصار وللهواشم
علوم دينيه إو فراسه وغطّت إعلوم العوالم
وصار بالموقف صليل سيوف وإمسامر ضياغم
وعبـاس أخذ مأخذ شرف...وما خلّه يجدمهم سلف
لاچن إبن ظاهر هتف
ضـاگت يعباس...علينه الواسعه
لحسين لا بـاس...أمرنه إنودعه
ويرشدنه بأمر ألله ونبيّه...يوم المنيه
* * *
أوچبت دون أبو اليمه وإبمناياها إتباشر
والرماح الهاشميه گطب وألأفلاك تفتر
وبيد ألأنصار المواضي وبلسنها النار تسعر
إتگلط حبيب ودمعته...تذرف إو لاوي رگبته
من حسين يطلب حاجته
يحسين ناداه...تره عفنه ألأهل
وألأمـل بألله...وتحقيق ألأمل
إنتم توسدونه الوطيـه...يوم المنيه
* * *
إتگلط إلما غفت عينه وسكن نبضه إعله المذله
گمر عدنان إبسماء العزم مصباحه تجله
وصاح لو تجدم أنصارك لليناشدنه إشنگله
لو ينوخذ وجـه الحرب...ما يهجع الهاشم گلب
ولا ترضى ألأنصار إتعگب
صاح إبو ألأحرار...يبوفاضل أود
إنتم وألأنصـار...تنولون الگصد
ويا محله كدّتكـم سويه...يوم المنيه
* * *
