حبيب بن مظاهر ألأسدي رضي ألله عليه
«شيعتي»
هـاجت أرواح الهمه...بالهمه
من ساعة الگالو بله...حيو شهادة كربله
والتضحيه إبواديها
* * *
من نشأ خلق ألأرواح الباري بالذروه العليه
وإصطفه لحسين صفوه إنفوس قدسيه إو زكيه
إنعقد ميثاق الشهاده والسعاده العبقريه
باللوح من خط القلم...خطط تصـاوير الهمم
وأرسم لبن ظاهر علم...وإنذخر للغاضريه
عاش العلم والزمّه...بالهمه
من الحسين إتسلمه...إو ركزه إبگلب الغانمه
والتضحيه إبواديها
* * *
إتحزم إبسيف القياده وإبمحاسنها تغطرس
إو هبّت إرياح الشهاده وإنعشت روحه إو تمايس
إو صاح وين إللي تحجل خيلها إبدم المغارس
وين اليحاسب صارمه...بحساب يوم الملحمه
إو بالغانمات إيوزّمه...وين البجهده إمنومس
إو طيب الشهاده إيشمه...بالهمه
تـاريخ مجده إيخلده...بإسم الشهاده الخالده
والتضحيه إبواديها
* * *
نهضت أرباب الديانه إبأمر دين ألله اليهمها
إو تاجرت ويّه إبو اليمه والبضاعه إعقود دمها
إو ربحت الجنه إو هواها وأخذت الدنيه إو علمها
فرسـان متهاب الخطر...خلدها تاريخ الدهر
وإيرفرف إبجو الظفر...بإسم إبن ظاهر علمها
إو صفّو إحساب الذمـه...بالهمه
من صـاح فاروق اللوه...هذي منازل نينوه
والتضحيه إبواديها
* * *
إشلون صفوة مجد سامي الباري لحسين إصطفاها
مثّلت شمس الديانه إو ظهر بالعالم ضحاها
نصرت الدين إبذممهم چانت إو بالطف أداها
إدّو مراسيم العهد...إو سارت عله ضي الوعد
وإنشرو إكليل السعد...بيد إبن ظاهر لواها
إو شمل الضياغم لمّه...بالهمه
ناداهم إبروضة حمه...حط الحسين إمخيمه
والتضحيه إبواديها
* * *
يا إسباع الكون چيف العيش والنوم إيهناكم
إو زينب الكبره گلبها إمريب إبكثرة عداكم
گومو ويايه إنتچنه إگبالها إو نشرو لواكم
عيناك صاحو وإنهضو...لمخيم حسين إعتنو
وإبوجه زينب كبّرو...نحيه وإنموت إبولاكم
خدامكـم نتسمه...بالهمه
نصرتكم إعلينه فرض...إو بذل النفوس إبهالأرض
والتضحيه إبواديها
* * *
هوني يمودعة حيدر هوني لا ينخطف لونچ
إرگابنه الخدرچ إنمدها يا حلات الموت دونچ
وإخوتچ وأنظار إخوتچ والله تنعملچ إعيونچ
وإحنه الفرع وأهلچ أصل...إو ما عن ولاهم ننفصل
من يصل خـدرچ من يصل...صيحي وإحنه إنصيح عونچ
إو حمل الثجيل إنزمّه...بالهمه
لاچن يبت عقد الوله...شوفي الشهاده إلمجبله
والتضحيه إبواديها
* * *
والنعم گالو إو فعلو خاضو إبحور المنايه
إو حافظو حد المخيم وأصبحو بالحد ضحايه
إو طاح إبن ظاهر رميه إو طاحت إبكتره الرايه
إو جاهـد حبيب إوما گصر مجهوده...دون المخيم وإنصرع بحدوده
إو ضحّه الخدر زينب حياة إوجوده...والضحه إبروحه كفايه
وإنصبغ شيبه إبدمه...بالهمه
وإبكربله عنـده علم...ينذبح بيها إو يغتنم
والتضحيه إبواديها
* * *
من فتح عينه حبيب إو شاف أبو السجاد يمه
فرفرت لحسين روحه إو من إجروحه إيفيض دمه
ما يهمه الموت لاچن غربة حسين إلتهمه
ودعتك ألله ياعزيز الزهره...وحسين حن گلبه إو ضمه الصـدره
لحسين إبن ظاهر يشمه إبنحره...هالله هالله إشلون شمه
وأدرك حيـاة ألأمه...بالهمه
للدين ركّز رايته...بأرض الطفوف إبنهضته
والتضحيه إبواديها
* * *
