الحر الرياحي رضي ألله عليه
«شيعتي»
شوف الحكم وألإراده...قدسيه للحر جهاده
للحر عنوان...صار ألإيمان
وإهتده إبنـور الشهاده...شوف الحكم وألإراده
* * *
وگف تتراجف إعظامه إومندهش وأصبح إبحيره
إو شاف نفسه بين جنه إو نار ما يعرف مصيره
ركّدت گلبه الشهاده إو حسّنت فكره السريره
وإختار جنة الزاهيه...إو خلّف الگوم الطـاغيه
نار الجحيم الحاميه...إو هذا منتوج البصيره
وأنجد الحر لطف ربه...إونور التمركز إبگلبه
نور ألإيمان...ضد الطغيان
ثبّت إبدينه إعتقاده...شوف الحكم وإلإراده
* * *
إشلون صدت بخت صدها إبن الرياحي إو نجح بيها
إو عيّن إبيوت النجاة إو لكد مهره إو گصد ليها
إو صاح إليريد السعاده من طريق الحگ يجيها
شاف السعاده إمهلهله...إبوجهه إو تنادي يا هله
إو نصرة حسين إبكربله...بيع دمك وإشتريها
وإبرضه البـاري إتنوّر...بالهده إو أسس إو عمّر
بالجنه إديـار...ويّه الأنصـار
حر الرياحي إبسعاده...شـوف الحكم وإلإراده
* * *
إيلوب بين إيد الحسين إبن الرياحي إشلون لوبه
إبرگبته طوگ المذله إمچتف إبشدة إذنوبه
إيصيح يبن الزهره إدرك عبدك إو نزهلّه ثوبه
يحسين بيكم أججت...والگلب زينب روّعت
إو هسّا عله يدّك تبت...إو تنقبل بيكم التوبه
من رضه البـاري رضاكم...مذنب إو لاجي إبحماكم
تـايب لله...وأطلب مرضاه
وإلكم العـف والسياده...شوف الحكم وإلإراده
* * *
آنه أول من تعرض ضعنك إو غشني غروري
إو لو أصير أول شهيد إبنصرتك غاية سروري
كون أبيض وجهي وأعدل زلتي وأصلح أموري
وإبحد خدر زينب أمد...رگبتي إو عالموت أستعد
يحسين دليني الرشد...وإعفي عن جرمي إو قصوري
شاف الحسين إنتصاره...ناده يالحر البشاره
ذنبك مغفور...سعيك مشكور
وأشهد إبربي شهـاده...شوف الحكم وإلإراده
* * *
نال مِنّْ حسين أمره إو ركَّز إبگلب الشجاعه
إو وگف بموسط الكون إو صد عله الكون إبوراعه
صاح أنه الحر الرياحي إو تگرب إبصارمي الساعه
إبحب الحسين إتعلگت...إو حصلت منه إشما ردت
ببيوت ألأكرام إخدمت...وإخفضت جنح ألإطاعه
إبيوت الوحي والرسـاله...تچسي الخادم جلاله
والحر الحاز...هالخدمه إو فاز
إو سر بالحسين إعتماده...شوف الحكم وإلإراده
* * *
خطب بالكوفه إو عذلها إو سلّت إبوجهه الصوارم
لبس إيمانه إعله درعه إو زرّه ببنود المغانم
إو صارم النصره إبيمينه إو ينثر إچفوف إو جماجم
خله الحزم تطوي الحِزم...والزلم تسحگ بالزلم
إو لا فتر من الحـر عزم...وإبرضه المعبود غانم
إحتـارت الوادم إبأمره...شعدّله إو حسّن الفكره
گـاصد لحسين...يجهد للدين
إو عاف ألأمر والقيـاده...شوف الحكم وألإراده
* * *
إنحدر محدار ألزلازل عالحرايب من مزنها
خبط وإتخبّط الحومه وأخذ صافيها إو رجنها
إستشهد إبنصرة حسين إو حصّل المگصود منها
إو ردن الشهاده إتوسده...وإتمدد إبحجر الهده
وحسين إجاه إوشاهده...إو شكر ثدي أمه إو لبنها
ما خطت أُمك بسمها...سمتك حر إبعلمها
حر بالدارين...تنعم لك عين
رحمة الباري العباده...شوف الحكم وإلإراده
* * *
