مسلم بن عقيل عليه السلام
«ميمر مذيل»
إيمانه إيمانه...مسلم إو إيمانه
عجب ملايكـة السمه...مسلم إبإيمانه
* * *
مسلم إبإيمانه الوفه إيشع نوره...إو سامي مقامه
مثّل علي إو همة علي إبكل صوره...إو طبّق نظامه
مسلم بالحسين إقتده دستوره...إو شيد قوامه
بنيانه بنيانه...للدين بنيانه
شيد مراصد للمنع...مسلم إبإيمانه
* * *
مسلم إبمضمون الرساله إتبصر...لمن حملها
وإبنور قدسية الحسين إتنور...قدس محلها
إومن عرضت إعليه الشهاده إستبشر...وإتبرع إلها
وجدانه وجدانه...تاجر إبوجدانه
وإستلم بالجنه النفع...مسلم إبإيمانه
* * *
من سدر للكـوفه إو نزل واديها...عندك خبرها
من الگلبها إمن خبط صافيها...إو شوّش فكرها
يا هله إبمسلم من تفرس بيها...إو حارت بأمرها
سلطانه سلطانه...وإبـأمر سلطانه
طبّق قوانين الشرع...مسلم إبإيمانه
* * *
للدين عالموت إستعد بالحومه...وإنرصد حده
للدين جاهد وإجتهد بعلومه...وإنشكر جهده
وإيهلهل إبوجه السعد ورسومه...والنصر سعده
عنوانه عنوانه...بالدين عنوانه
متبصر بأمـره إو ورع...مسلم إبإيمانه
* * *
مصباح مسلم بالفراسه إتجهر...والطعن شاهد
متمرن إو دارس فراسة حيدر...والهدف واحد
تكبير عمه بالحرب لو كبر...والحرب جامد
ميدانه ميدانه...لو عُمـر ميدانه
ذب الگلب فوگ الدرع...مسلم إبإيمانه
* * *
من صكت الكوفه إبحريب النيبه...ما فزع منها
محتسب بألله إو ما يعرف الريبه...إو لا نشد عنها
ضنوة عقيل إو من علي تدريبه...غطها إو رجنها
فرسانه فرسانه...والحرب فرسـانه
جامـده إومسلم منتشع...مسلم إبإيمانه
* * *
لتگول مسلم چتلته هذي الگوم...إو فـاضت إدمومه
من عالم ألأرواح هذا المرسوم...نفّذه إبيومه
أول شهيد أصبح وأخذ بيها إعلوم...عندك إعلومه
صيوانه صيوانه...للفلك صيـوانه
نـور إبمحاسن مرتفع...مسلم إبإيمانه
* * *
