الشهيد ألأول
« شيعتي»
مسلم قلـم إيمانه...إيمانه
أول شهيـد إمسجله...حامل شهادة كربله
بالعالم الروحاني
* * *
من بنه ألأرض إو سماها الباري بأحكام إقتداره
إو جعل دين الهادي عگبه ببو السجاد إنتصاره
إو مسلم أبأفق الشهاده گمر تتشعشع أنواره
إو رب البريه مكّنه...لحسين بأمر السلطنه
إو مسلم سفيـر إمعيّنه...إو حمل مرسوم السفاره
يتشعشع إبعنوانه...إيمانه
يا هله إبمسلم يا هله...بنـوار مجده إمهلهله
بالعالم الروحاني
* * *
چالگمر من عالم الذر مسلم إيشع بالكرامه
إو مضه إبقائمة الشهاده إو للوفه حامل وسامه
إوبيض التاريخ جهده من المبدأ للقيامه
ما گصر سيفه إو سـاعده...وإبمنهج حسين إقتده
وإبشمعة الدين إهتده...إو شرف الباري مقامه
مسلم علم وجـدانه...إيمانه
يرفـل عله روس المله...والشرف حازه إو مثّله
بالعالم الروحاني
* * *
هاك إخذ عنوان مسلم من لبس درع الشهاده
قائد إبنهضة حسين إو شد نياشين القياده
إو گصد للكوفه إو نزلها إو ثبّت إبألله إعتقاده
ما فزع گلبه إو لاجزع...وشصنع بالكـوفه إشصنع
حتة الملك صوته إرتفع...قدّس المسلم جهاده
مسلم نشر برهـانه...إيمانه
وأنوار جده إمهلهله...إو عين الجهد تتمثله
بالعالم الروحاني
* * *
لو طلگ بالحرب رمحه فجّر إدموع الضماير
إو لوعطش بالكون سيفه يروه من دم الحناجر
حيدر إو مسلم الثاني إو غيرهم ما بطل صاير
حيدر محمد شاهده...إو مسلم حسين إيـأيّده
إو نية جهدهم واحده...والجهد للدين ناصر
وإتمركز إبسلطانـه...إيمانه
مسلم مثل عقد الوله...جامع صفات الكامله
بالعالم الروحاني
* * *
مسلم إبحملات حيدر حمل وإتفرس الكوفه
إو شال درنگها إبفراسة هاشم إو دمر إصفوفه
ما يعرف الخوف گلبه بس لبو السجاد خوفه
شـوف الشرف والعاطفه...إو شوف المحنّه والوفه
مسلم إبمجهوده إكتفه...إو عين توفيقه تشوفه
فجّر ثمر بركانه...إيمانه
تـاج الوفه والمنزله...شرّفه الباري إو جمّله
بالعالم الروحني
* * *
لا تگول إنصرع مسلم من إسيوف الجاهليه
مسلم إبهاي الشهاده إمعاهد الباري إو نبيّه
بلَّغ أحكام الرساله إو حفظ لحسين الوصيه
شوف الهبـه إو شوف السعد...إو شوف المغانم بالجهد
مسلم إبمصرف حگ رصد...شرف بجنان الزهيه
والجثته دفّانه...إيمانه
إو دم الديـانه غسله...وإتخلد إبروضة هله
بالعالم الروحاني
* * *
