طفلة الحسين العليلة فراق وغربة وعلل
« العجز هجري + حسيناوي»
انشد الدار اوياي...ليش عافوني
يالدريت ابعلتي
واليعرفون ادواي...ليش عافوني
* * *
مشت روحي الكربله...اوعالضعينه اتحوم...ترعه غيابي
او بالمرض جسمي ابتله...او يـوم اشد من يوم...شدة امصابي
اوهاي إلي متسجله...ابساعة المقسوم...افگد احبابي
اعتب اعلـه المقسوم...لوعلى إضعوني
ما اظن بيهم جفـو...ليش خلوني ومشو
واشيضرهم ممشـاي...ليش عافوني
* * *
وهاي حكمه واضحه...اقتضت للمعبود...ودنت ساعتها
تظل عيني شابحـه...تظن بهلي اتعود...او سلت شحمتها
والجفوني امجرحه...والدموع اتجود...تگص شفرتها
اومثل دمعـة يعگوب...دمعة اعيوني
بچه اليوسف والده...او مني چم يوسف غده
او بيض اعيونـي ابچاي...ليش عافوني
ونه ابداري اتغربت...واخوتي حيين...لاچن بغيبه
اومن اگول اتيتمت...وآنه ابوي حسين...عدل ادري به
يالعلي والله انصبت...بالچبد سهمين...ما لهن طيبه
سهم الاول غياب...بيتي صابوني
والمـرض ثاني سهم...وظل يعث بيه الألم
وأنشف ابجسمي إدماي...ليش عافوني
* * *
شان الضعون المشت...جارهم مأمون...وآنه مضمونه
حكمة البـاري اقتضت...كون يتغربون...وآنه مرهونه
وعلتي بيـها ابتلت...گبلي ام هارون...ابموسى مفتونه
وآنه چم موسى الراح...مني تدروني
مثل أيوب انصبت...بالمرض ساعه اومتت
واليگطرولي الماي...ليش عافوني
* * *
اتگوم بالدار او تگع...او ضعف منها الحيل...وانگطع بيها
طفله ماخذها الفزع...او شال عنها ابليل...ضعن اهاليها
والگلب منها انخشع...والدموع اتهيل...نارتچويها
وتصـرخ اشلون اشلون...وحدي خلوني
وانگطع حبل الأمـل...ما ترد ليـّه الأهل
والمحمد شكـواي...ليش عافوني
* * *
للرسول اتوجهت...والدمع ينهـار...عالوجن هالي
يجد صد ليه إصرِخت...وأطفي جمرة نار...غيبة الوالي
ما أگـول اهلي جفت...تعلم الأسرار...واشجره ابحالي
راحـو اليتفگدون...واليداووني
وآنه من روحي إجزعت...وعلى القبله اتمددت
او آيست من دنياي...ليش عافوني
* * *
يجـد وافاني السهر...او ما اشوف النوم...اوما إلي چاره
يجـد خلاني الدهر...بس أدَور إعلوم...حسين وانصاره
مرض وافراگ اوسهر...اوجبل من هموم...بيه محتاره
من بچه الزهره ابچـاي...الناس ملوني
يجـد مالومة گلب...يجد مسجونة غرب
مثل سجنة ولياي...ليش عافوني
* * *
