ما أريدك تعودني عله ابعادك...ما أريدك تصّبرني لميعادك
ارجع لي أوج روحي لميلاك
يا مهدي...يا مهدي

عودتني اعله انتظارك بلكت اتعودني أشوفك
مره واجهني حقيقة ما ردت لمحة طيوفك
اعترف لك ما عفتني آني خادم ما أعوفك
ردتك ولو لحظه تمر...وأحسبها لك جيت عمر
أزعل وأدور لك عذر...وآنا ما أعرف ظروفك
مو كافي تعلمني عله اغيابك...مو كافي يهل دمعي عله بابك
مو طبعك تبجّيني عله أعيادك
يا مهدي...يا مهدي
 
ما تجيني اليوم لكن انتظر باجر وباجر
وشكثر ناس التقلي ما يرد ليك اليسافر
أطوي صحراء انتظارك وألتفت يم المنابر
بكلت أثر بلكي ضوه...بكلت تمر نسمة هوه
ها بلكت يرف اللوه...قاعد أحسبلك وأناطر
مو طبعك تفززلي جراحاتي...مو طبعك تضعيني ابمتاهاتي
ما أريدك ترخصني لحسادك
يا مهدي...يا مهدي
 
يا بو صالح انت وينك وينه عنوانك دخيلك
مو فرق عندي المسافة مو مشي أركض وأجيلك
المهم عندي يغالي يلتقي ناري اويه ليلك
من أشوفك يا بو صالح...آنه أعرفك بالملامح
الهاشمي من دمه واضح...امبين من اعجاج خيلك
يا ساعة تخلصها معاناتي...يا ساعة ترجّعها ابتساماتي
والباري يقدرني عله اسعادك
يا مهدي...يا مهدي
 
الحلم طّول يمهدي وانت شو طوّل رجوعك
من أرش بابي بدموعي ما شفت جمرة دموعك
هاي أصابع ايدي تشهد تنجوي من أشعل شموعك
يضوي شمع درب السفر...الوادي وبوسط النهر
مو ذبّل اعيوني السهر...وأنشد الغيم الطلوعك
ما تنظر يمهدينه محبينك...يالغالي يلقبونه مجانينك
ما جاوب بعد قلبي إذا رادك
يا مهدي...يا مهدي
 
ينتهي ليل المدامع يبتدي ليل انتظاري
والعمر ضحكة شماته وجيتك رد اعتباري
لهفة العطشان بيه قاعد بشمس الظهاري
ومتاني جيتك يا ورد...طفيني يالجفك برد
كل اليسافر شو يرد...وانت تاركني اعله ناري
ارجع لي دخيل الله يمهدينه...ارجع لي يبس وردي وبساتينه
ارجع لي سأل جرحي عله اضمادك
يا مهدي...يا مهدي
 
قالوا الجيتك علامة وهوسة ها خوتي وينه
هوستي تسمعها زينب حته ما تبقه حزينه
سمعي يا زينب الهوسه ويستمع حامي الضعينه
بيّن مهدينه وسل سيفه...راعي الدنيه وكلشي بكيفه
هوسنه والهوسه انتهت...يا وسفه خيلك ما اجت
ما أقول زينب أيسّت...قالت المهدي يجينه
يا صبرك ولا نصبر عله افراقك...يا صبرك ولا تحضر لعشاقك
يا ساعة ترد حارس عله ابلادك
يا مهدي...يا مهدي