يا مهدينه يا مهدينه...بيك انعيش وعايش بينه
إي نعم لبّينه...لا تخاف اعلينه
يا مهدينه يا مهدينه 
 
من قبل لا يشع نورك شيعتك عقدت أملها
تنطر ابشارة مليكة وعينهم مشبوحه إلها
اذكرنه أم النبي موسه الما ظهر منها حملها
أم موسه من جاها الخبر...حملت لجن ما من أثر
بلحظه وكليم الله ظهر...ونرجس أمك هم مثلها
حته بحملك غايب سرك...من قبل اصيارك ننتظرك
إي اشكثر تانينه...لا تخاف اعلينه
يا مهدينه يا مهدينه 
 
شبه فلقة قمر وجهك بزغ عالكون بتمامه
والشمائل يوسفية وللحسن برزت علامه
أدعج العينين لونك حنطي واعله الوجنة شامه
حسنك فريد ويختلف...من ينوصف أقنه الأنف
الشعر أسود عالجتف...والوجه حلو الجهامة
حسنك يعكس أروع آية...وجهك عن الباري امرايه
إي يمظهر دينه...لا تخاف اعلينه
يا مهدينه يا مهدينه 
 
اشلون للدنيه إجيت وعقب لحظه من الولاده
بدت تظهر لك معاجز وابتديت بهالعباده
رافع السبابه ساجد لله تشهد بالشهاده
قالت حكيمة اشهل بشر...باليوم عن سبعة كبر
الأسبوع يكبر بيه شهر...مظهر الله ابهالإرادة
مو قانون الكون ايحده...أول يوم ويحجي بمهده
إي ويشع اجبينه...لا تخاف اعلينه
يا مهدينه يا مهدينه 
 
الشيعة متهنت بعدها بيك يا خاتم العتره
إلا خمس اسنين لن اتغيب عنها بغيبه صغره
اتطورت الأحداث صارت غيبه كبره ونار كَبره
وبغيبتك يبن الحسن...ندري رغم كل هالفتن
غصبن عله خشم الزمن...الله ينفذ بيك أمره
مهما اتطول اعلينه الغيبه...هذا بحكم الله وترتيبه
إي برضاك ارضينه...لا تخاف اعلينه
يا مهدينه يا مهدينه 
 
إي نعم قلب الموالي يستعر يالمهدي ناره
لاجن العايش وجودك ما يهم طول انتظاره
بغيبة النعماني قال الصادق اسمع يا زُراره
إعرف إمامك ما يضر...بمعرفته تأخير الأمر
ولو متت وأنت منتظر...كأنك بفسطاط داره
اوجودك بينه والله يديمه...مثل الشمس الخلف الغيمه
إي الشمس تهدينه...لا تخاف اعلينه
يا مهدينه يا مهدينه 
 
نعكس الآية وننادي يالذي ما تنسه ثارك
نعم مسنه الضر يغايب والوضع كون ايتدارك
لجن ما نحجي بغيابك إلنه ملينه انتظارك
ابكيفك ترد لو ما ترد...جيشك يغايب مستعد
يوم الذي انشوفك تهد...عدنه هاليوم المبارك
تعلم بينه ويبقه ابكيفك...تشهر لو ما تشهر سيفك
إي ولا ملينه...لا تخاف اعلينه
يا مهدينه يا مهدينه 
 
راح أقدم لك نموذج عن ثبات الجعفرية
عاين الحشد المقدس بالبسالة الحيدرية
ظفر أصغر شاب عدنه أشرف من أتباع أمية
واحدنه بالحومه فته...بيه الشجاعة ملفتة
سيد السيستاني فته...إحنه جند المرجعية
نكتب عالراية من انقاتل...جاء الحق وزهقَ الباطل
إي ترف بيدينه...لا تخاف اعلينه
يا مهدينه يا مهدينه