الكاظم السجين وصبره العجيب
« «ميمر مذيل»»
بالسجن بالسجن...بـاب الحوائج
بالسم چتل راح...صاح الملك صاح
بالسجن...باب الحوائج
* * *
غربة الكاظم نايبه إو بالكونين...تسمع صداها
إو سهم المصيبه فجر إدموع العين...كثـّر بچاها
أحا يفگد اليتم أرباب الدين...بارض إو سمـاها
والفلك والفلك...وضعـه تغير
ركـن ألأمل طاح...صاح الملك صاح
بالسجن...باب الحوائج
* * *
تسمع إوداع البالسجن ما يدرون...عسره إو مـراره
إبطاموره حدر ألأرض جسمه مرهون...ليله إو نهاره
ممرود چبده إمن الظلام إو مطعون...تلتهب ناره
بالگلب بالگلب...سهم النـوايب
گطع السباح...صاح الملك صاح
بالسجن...باب الحوائج
* * *
ممرود گلبه إو منگطع سباحه...والجسم ناحل
وإبروحه شفرة غربته الجراحه...تبـري المفاصل
إو ما تغمض إعيونه إو يشوف الراحه...من السلاسل
إو ينتظر ينتظر...سـاعة وفاته
تفداه ألأرواح...صاح الملك صاح
بالسجن...باب الحوائج
* * *
شوف الصبر شوف الحلم من آيات...راعـي الإمامه
ما يفزع إو لا يجزع إمن الشدات...يظهر كرامه
إو سطرة السندي إبوجه قاضي الحاجات...ظلت علامه
وأفجعت وأفجعت...گلب الرسـاله
والخمس الأشباح...صـاح الملك صاح
بالسجن...باب الحوائج
* * *
مالوم من ساقه المجرح مالوم...ما نشف دمه
خلصانه روحه إو عينه متشوف النوم...من ثگل همـه
طلعوه من سجنه إو دليله المسموم...يسعر إبسمه
والحزن والحـزن...خيم علينه
والسندي إرتاح...صاح الملك صاح
بالسجن...باب الحوائج
* * *
جسم العليه ظلت أملاك الرحمن...بإسم الجلاله
من عگب ما چتلوه إبسم الطغيان...گوم الضلاله
بأربع عبيد إيشيل نعشه السجان...وإشجره إبحـاله
والدهر والدهر...صابت إسهامه
والسهم جراح...صاح الملك صاح
بالسجن...باب الحوائج
* * *
نعش الغريب إعله الجسر من ذبوه...هوه إو حديده
ما خففو من الحديد إو حلوه...من رجله وإيده
إو گلب الرضا بسهم النوايب صابوه...إو روحـه إبوريده
إو حـايمه حايمه...إعله الجسر روحه
إيصك راحٍ إبراح...صـاح الملك صاح
بالسجن...باب الحوائج
* * *
