ياللي تود المصطفه إو عترته...إگصد الكـاظم وإحضه بزيارته
* * *
ياللي تود أهل النبوه الطهر...بالمال جود إو بالنفس والعمر
جيم إبعزاهم تنجه يوم الحشر...إمن النـار إي والخالق إو عزته
* * *
ياللي تود تنجح إبيوم المعاد...إمن أقصى البلد إگصد الـوادي إبغداد
إبگلبٍ جريح إو روح عزي الجواد...بمصاب جده إو وّن عله ونته
* * *
عزي الجواد الشهم بحر النده...بمصاب جده الگضه إبسجن العده
يالما حضيت إبشدته إتساعده...إو يالما حضرت إتشيع إجنازته
* * *
لاچن حضيت إبمأتمه إبهالعصر...إبكل عـام ليه إعتني إو دگ عالصدر
إو طب للضريح إو طيح فوگ الگبر...وإنتحب وإبچي إو حن عله غربته
* * *
إو نادي يمن بالغرب حاير وحيد...چنت إبظليمه إو حدر حكم الرشيد
إو يالچان إلك كل يوم سجنٍ جديد...العـدوان فضلك بأي سبب جححدته
* * *
وإطلب من المسموم كلما تود...حيث ألإله إجعله مأوى الوفد
ما گصد ليه وافد إو خايب يرد...إلا إبنجاح أمره إو فرج شدته
* * *
إي وحگ رب الرفـع سبع العله...حزتو المراتب فزتو بالمنزله
إو للدين شيدتو يهل كربله...إبمأتم نجل جعفر إو ريحانته
* * *
إبمأتم شبل جعفر چسبتو الرتب...أسأل الباري بالنبي المنتجب
إيأيد جميع السعه وصار السبب...إو كل البذل منكم جهد همته
* * *
أدعي ألإله إبضلع أم الحسن...ألإسلام يحفظها إمن أهـل الفتن
إتجيم إبعزه سادات هاشم لمن...يظهر وجود الدين من غيبته
* * *
ياجب عله الإسلام صبح إو مسه...تدعي إبگلب بي علته إميبسه
إو تقسم عله الرحمان بهل الكسه...إيعجل ظهور الغايب إو طلعته
* * *
بفضل النعم ينعم عليها إلإله...إو يجلي ظلام الظلم عنها إبسناه
لو جرَّد البتار وأنشر لواه...كل چبد مسلم يبره من علته
* * *