ألإستدلال بالنص الساطع على إمامة
الإمام السابع موسى بن جعفر (عليهما السلام)
«هجرى»
بيك يا قائد الفرقة ألأحمديه أتنظمت...وإبقوانين الشرعها الصادق المله إحتيت
* * *
بالسيايه الأحمديه وعلم رباني نهج...الصادق وبث العلوم المقتبسها إمن الجحج
وشرع منهج للشريعه وكل محاججها فلج...وإبمواد الحگ حكمها وإبيمينه إتسلمت
* * *
وسور البحد الشريعه إبهندسة قدره بناه... وطلسمه إبسر الجلاله الحازه بالعصمه وحواه
مثل ما رب البريه بلا عمد رافع سماه... خيمة الصادق رفعها وعله المله خيمت
* * *
وإنته يا وارث الصادق حزت علم ألأولين... وبحر علمك فاض مايه وروت منه العالمين
سابع أرباب ألإمامه وعالوحي ثامن أمين... وعروة التاسعة البيها المسلمين إتمسكت
* * *
إنتم الظاهر وإنتو الباطن وفرع ألأصل... والتحاججني إبولاكم يا بني سيد إلرسل
ندعي أنفسنه إو أنفسهم إو ثمّ نبتهل... ولعنة الباري نحطها عالطغت والخالفت
* * *
الخالفتكم يا بني ياسين مسلوبه الفكر... ميلت عن الرشاد وسارت إبدرب العثر
الباري ذاكرهم إبسورة «عبس»وإبآخر سطر...وهذا شان أهل الضلاله العن ولايتكم عمت
* * *
العمت عن حق اليقين ومالت الدرب الضلال... إلها يوم البيه تصحه وتنتبه من ألأغفال
من يعض الظالم إيده ومن يعرضون ألأعمال... ذاك يوم إيذكروها بالذي عنه سهت
* * *
والسهو بالدنيه عنه حاكم الكبره يصير... بالحشر من ألإله إمفوض الهادي البشير
وإبمحامات الموالي ناجح إيصير ألأمير... وتاخذ إكتاب التبريه البألأيمه إتوثقت
* * *
إلحظت بالنار إبرضاكم نجت من نار الجحيم...إمن القسيم الصك بديها وتعبر إعله المستقيم
ما تجد عالباب عارض من تطب دار النعيم... والذي جحدت فضلكم عالصراط إتحيرت
* * *
كل فرد منكم شفيع إمشفع إبيوم الحشر... وإنته يا باب الحوايج ذخر يا نعم الذخر
إلك من الله الشفاعه من عوض سجنك أجر
يا مسجون يالهاظمك سجانك ...يا مظلوم يالظلمتك عدوانك
يا لمغصوب حگك إو جهلو شـانك
ذچر سجنك من تسمعه الناس دمعتها جرت
* * *
إبطن حوت البحر يونس لاذ بيكم من هوه... إبنوركم چان إيتسله ويقتبس منه الضوه
وإنته يا باب الحوايج تنحرم شم الهوه
يا محروم شم الهوه ويا مسجون ...آه إعليك يالصعب فگدك ميهون
والسجان چان إبمرارك مفتون
ومهجتك مر المصايب من السندي تجرعت
* * *
وإنِّعت أيوب صبره وشاع بين العالمين
وإنته يا سابع اليمه ويا زعيم المسلمين
بلوته إبلواك هانت صبرك إيشيب الجنين
گلب أيوب يجـزع البعض الصابك ...بلب إحشاك چامن يعزنه إصوابك
نار ابنار يلتهب جمر إمصابك
تلوج منه ومن الونـّه إهروش دلالك لوت
* * *
ولا سجن يوسف مثل سجنك عسر مظلم شديد
ولا مثل ساگك تجرح ساگه من ثگل الحديد
آه من ضربة السندي آه من ظلم الرشيد
يا مسموم گطع دليلك سمه ...ونعشك ليش آمر عبيد إتزمه
وساگك چـان منجرح سايل دمه
يا غريب وعله إمصابك ما سوى الباري بچت
* * *
يا گطيع الچبد بالسم هاي إجتك شيعتك
إمكدّره وتجذب الونه يا غريب الغربتك
إنفجع من عدها الدليل إبصوت ناعي إمصيبتك
يا مفگود فگدك يعز عالإسلام ...ما راعوك جارو عليك الظلام
بالدلال يفرع إمصابك كل عام
أوجرت نار المصيبه وشيعتك ليك إعتنت
* * *
