يا كتاب ألله الناطق يا ترجمان الشرع...سابع وثامن إو تاسع نور من أصل الجمع
* * *
يمن نورك نور تاسع بزغ من برج الهده...وحجة التاسعه إمن ألله إو عله إعباده شاهده
وعروة التاسعه وتاسع منهل إبحور النده...وتاسع إهلال التجله إبسمه العصمه مرتفع
* * *
يا نقيب الثامن العيّنك رب العالمين...وقائد الثامن وبيك إنتظم جيش المسلمين
وركن ثامن للديانه وعالوحي ثامن أمين...وإنچسه ألإسلام جسمه إبهيبتك ثامن درع
* * *
يا من الباري إبحكمته رشحك سابع إمام...وإبيمينك علم سابع رف عله روس ألإسلام
وخيرة السابعه إمن الناس عگب سيد ألأنام...إستأثرت علمك الخمسه وإنته وارث للسبع
* * *
يا من المعبود خيره إختارك إو صفوه إصطفاك...ما تمس النار جسم الزارك ولاذ إبحماك
والذي يمتنع ما يتمسك إبعروة ولاك...عن دخول الجنه باچر بالقيامه ينمنع
* * *
يا شفيع الناس خصمك بالحشر ما له شفيع...من يطب للنار ممحل لا چن إيطيح إبربيع
ظل يحوم إو حميم الورد وغذاه الضريع...طعمه إتصرحه ألآيه مُر نتن ما ينجرع
* * *
والذي إبحبك أنعجنت طينته وگلبه سليم...صدر أمر الباري حتما تحرم إعليه الجحيم
ورده تسنيم إو رحيق وسلسبيل إو بالنعيم...إغذاه ما تشتهي ألأنفس مائده إلما تنگطع
* * *
وخصلك المعبود روضه ومن تطبها الزائرين...وتصغي إبسمع الحقيقه وتسمع الروح ألأمين
يصيح يا زوار إدخلوها بسلامٍ آمنين...هاي جنات النعيم وبيها نور ألله يشع
* * *
لذنه إبگربك ترانه يبن حماي الدخيل...نجد كثره إگبور لاچن قل من يحمي النزيل
وإنتم أرباب الحمايه إمرشحين إمن الجليل...التاجر إويا الباري بيكم ميه بالميه النفع
* * *
يفرح اليدخل ضريحك لچن دمعه ينسچب...بفرحته چي نال گصده إو رجع مغفور الذنب
ولو تصور عسر سجنك نار دلاله تشب
يا مظلوم يجذب عليك الونه...وإيناديك يابو الرضا يمچنه
يا مسموم زاير إو ليك إتعنه
مثل مجره جرح ساقك يجري من عينه الدمع
* * *
سيدي ولطمة السندي الخلت إبوجهك وسم...وسمت چبد اليودك والدمع ظل ينسجم
يا فجيد الكون ريت الكون دونك ينعدم
عالإسلام يالما يهون إمصابك...آه إعليك يالمـاضي بيك إصوابك
ريت إيكون شلت يمين الصابك
وخله گلب الدين مالوم الفگدك ينفجع
* * *
الناس تسمع بيك مغلول إو معگوط السجن...ما دروك إشلون حاير وبحديدك ممتحن
من تشم الهوى السجان يضربك عالوجن
شذنبـك چان يا بو الرضا يا مظلوم...يا مسموم يالمنغصب يا مهضوم
من إعداك يالمنحرم طيب النوم
إتلوج من السلسله وطوگ إبجيدك منوضع
* * *
سيدي دمع اليودك فوگ صحن الخد جره...مثل سم الجره إبچبدك والدليلك فطره
ونار هظم الحرگ گلبك بالگلوب إموجره
تجري العين لمصابك وهاج الكون...ويچتلوك چيف إعله ألإسلام إيهون
إثلث تيام عالجسر نعشك مرهون
محير إو گلب المسيحي ينعطفله وينخضع
* * *
إهنا يهالمستمع حن وإنتحب وإجهد بالنحيب...وإلطم إخدودك إو نادي يا إمامي يا غريب
من ضريحه تسمع الصوت لعد صوتك يجيب
وإيناديك يا زايري إشتتمنه...عالمعبود إضمنت ليك الجنه
بالدارين برحمة الباري إتهنه
وآنه مفصل من الهادي ومن جسم حيدر ضلع
* * *