إلمن تنادي يحسين...إلمن تنادي
مابينك وبين اخوتك حال البين...إلمن تنادي
...................
من ضل وحيد احسين بين العسكر يطلب الناصر
ايمين اويســار ايعاين اويتحـــسـّر يطلب الناصر
مــن شافته زينب لخــوها إمحـيّر يطلب الناصر
صاحت ابولها خويه يانور العين...إمن تنادي
...................
إلمن تصـوّت يا عـزيز الزهـره إلمن تصوّت
كل اخوتك وانصارك اعله الغبره إلمن تصوّت
اولاظل بعد واحد الخدري اينطره إلمن تصوت
يحســين دلالي جســمته نصـين...إلمن تنادي
........................
جاسم يخويه الـچان ونسة عدنان إمخضب ابدمّه
ناصبـله حـوفه الزفتـه بالميـدان امخضب ابدمه
ابدال المنصه نايم اعله التربان امخضب ابدمه
او حنّاهن ابدم طبرته للـچفين...إلمـن تـنــــادي
....................
اوســـباح گلبــك منطـرح يامظــــــلوم فوگ الوطيه
امفصلين جسمه اوراسه بالنص مجسوم فوگ الوطيه
عاشــج منيتــه اوصار يحلالــه النـــوم فوگ الوطيه
او صابــغ اجـعوده بالدمــه والخديـن...المن تنادي
.....................
والجابني امن اهلي اوتوزم ضعني عباس اخويه
بيــه المـگـدّر ياحســـين افجعــني عباس اخويه
ايسـمعك تنادي وبالعتب يســمعني عباس اخويه
لاچن اشبيده اعليك يبن الطيبين...لمن تنادي
....................
إشبيده عليك امـگطعات اچفوفه بدر الهواشم
فوگ المسنايه طريح اتشـــوفه بدر الهواشم
مصيوبه عينه اوهامته مخسوفه بدر الهواشم
مابيه همه اينصرك ابهذا الحين...إلمن تنادي
.......................
يحسـين والله فسّــرت دلالي محنة غربتك
يحسين ماچانت يخويه ابّالي محنة غربتك
ياريتني عميه اولشوف اگبالي محنة غربتك
ولاأسمعك تنادي ينور العينين...إلمن اتنادي
.........................
يحســـــــين والله حيرتـني بنـــداك يزك يخويه
هاكثر خويه تنادي شيصير احشاك يزك يخويه
بـچّيت املاك السمه اوحته اعداك يزك يخويه
متشوف روحك وحدك ابلايه امعين...إلمن تنادي
.......................
ســـدّر يبعد اهـلي لـعد صيوانــك ياضوه اعيوني
واحفظ حراير خدرك اورضعانك ياضوه اعيوني
واتحمـّل الغربــه اوظـلم عـدوانك ياضوه اعيوني
عدوان كلها اوبينه حفّت صوبين...إلمن تــــنادي
.............................
