مأتمك شيّد للدين يبن الوديعه اركانه --- لوما وجودك يحسين چان انهدم بنيانه
------------
لوما وجودك وانته علة التكوين --- چان اضمحل رسمه اوتغيّر هالدين
ادرك الباري الدين بسمك يحسين --- ماغير شخصك احياه رغما على عدوانه
........................
وانته لعد الدين آيه اورحمه --- اوبيكم الباري تم علينه النعمه
وبمآتكم يتشرف اللي ايخجمه --- اليسعه ابخدمتك مشكور عند النبي سعوانه
........................
منبرك للإسلام خلد تذكار --- افروض الشريعه منه نعرفها اجهار
مأتمك للباري اظن بيه اسرار --- والباري خصك للدين رحمه گبل كيوانه
..................
منبرك عرفنه الفرايض تبيان --- عرفنه الاصل والفرع بيه الايمان
اصبح لعند الدين ثاني قرآن --- القرآن صامت يحسين منبرك صار السانه
بوجودك اعرفنه الاله اوطعنه --- اوعالدين صارتلك تمام امنه
لوما ابنفسك ترخص اوتدركنه --- الكل منه اصبح بالكون كافر يعبد اوثانه
.........................
لاچن وجودك سبب أجد شيعه --- واحمدنه بارينه اوصبحنه انطيعه
الدين بوجودك كمل تصنيعه --- اعلنت يبن الكرار بين البشر تبيانه
.......................
لاچن ابأسمك لذنه يبن الكرار --- اتخلصنه باچر يبو اليمه من النار
حـگنه على شخصك يبن حيدر صار --- والعبد حـگّه يحسين يشره على معلانه
....................
اعمالنه كلها ردي تدريها --- والحشر ميزان الذي ايصفيها
تترجّه منك شيعتك تحميها --- وتدريبه مالك يحسين بأمرك أهو ونيرانه
...................
إنـچان طبينه يبو اليمه النار --- حاشاك ماتحمل يبو اليمه العار
عوانك التفرح يبن حامي الجار --- وين الشفاعه أيـگولون من ابو اليمه اوشانه
........................
حاشاك ترضه أيـچايدونه العدوان --- اوما هـگوتي لنها تمسنه النيران
والنوح سلوانه اودمعنه جروان --- والدمع لجلك مفروض يبن الطهر جروانه
.....................
هالـچيف ننسه امصيبتك يامظلوم --- اويتجدد امصابك علينه ابكل يوم
نذكر وگفتك سيدي ابين الـگوم --- تطلب من اجموع اعداك يبن الطهر عوّانه
....................
والله من نذكر وگفتك يحسين --- من العده تطلب الناصر ومعين
گلب المحب ينصدع واتسيل العين --- اونيران فـگدك يحسين تسعر ابلب احشانه
..........................
نذكر يبو اليمه الحجر من صابك --- من جبهتك دمك جره اعله ثيابك
سهم المثلث اظن والله ذابك --- هذا الذي اجره العين دم الحشه اوآذانه
...................
اولمن طحت من المهر عالتربان --- سايح ابدمك شابـچ اعليك الزان
وتنومست ليش الانذال العدوان --- هذا يضربك بالسيف ذاك يجرب اسنانه
....................
اوزينب لمن صدت لعد وجه الكون --- مغبّر تشوفه امن العجاج اومطعون
گالت اخويه انصاب من يوصله اشلون --- لاون ابو فاضل حي يوصل لخوه اوعانه
............................
اگبلت زينب على التل وهيه اتصيح --- ابعيد البله امن الغوج يحسين اتطيح
من صوتها وصّل لبو اليمه الريح --- من سمع زينب تنخاه گام اوگع بمـچانه
.........................
اتناديه إخبرني يخويه ابحالك --- وادري السهم خويه مرد دلالك
خيل اوزلم هجمت لعند اعيالك --- اوحاشا المثلك يحسين يتسلبن نسوانه
..........................
ردي يزينب جاوب اوخليني --- حـچيـچ سلب روحي اوزاد اونيني
حيلي إنـگطع من السهم تدريني --- اوجسمي يزينب للجيش كله صفه نيشانه
.......................
أيست منه اوسدّرت مهظومه --- اوخلّت وليها اعله الثره بالحومه
وشبول هاشم چالضحايه ونومه --- اعله المشرعه راعي الجود نايم على تربانه
.........................