جسـام متحمـس علــيها --- للخير شمعته ايخليها
متروح تضوي ابمعانيها --- للخير شمعته امخليها
***
شوف هذا الشاب قرّر--- شمعته يعلـگها بيده
إجه ابزغر العمر يعلـگ --- شمعه تضوي للعقيده
شمعته زهرة شبابه --- اوزيتها من دم وريده
ايريد عمره ابمجد دائم --- عمر بالذل مايريده
ابن اثنعش عام اوعرف --- يختاراله موقع شرف
وگفة إبه اويه العم وگف --- ابساحة الطف المجيده
ويريد شمعته ابمعناها --- متروح تستمر بضواها
الاحرار خل تستدل بيها --- للخبر شمعته ايخلّيها
......................
تــوّه متفتح شــــبابه --- اوتوّه حالي ابعين امّه
ايعيف نزوات الشباب --- اوشنواليتحرّك ابدمّه
اتحرّكت بيه الحميّه --- ابرغبته يعتني العمّه
مايهمّه ايروح عمره --- ايهمّه مستقبل الأمّه
هالشكل جاسم رغبته --- ابدمّه يصوّر فكرته
ويريد يهدي صورته --- للشباب اللي يفهمه
ابتفكير ثابت ايمانه --- حسسّاس والشمعه برهانه
الأيام ابدا متطفيها --- للخير شمعته ايخلّيها
***
گبله حيدر نهض ويّه --- النبي اوجاسم سمع عنّه
حيدره ناصر الهادي --- اولعب دور ابزغر سنّه
حيدر اصـل الجهاد --- اوهذا جاســم فــرع منّه
اوعلي الأبنائه جعلها --- التضحيه مبدأ اوسنّه
اوجاسم ابهالمبدأ قنع --- نور الفخر شافه لمع
گدامه وبعزمه طلع --- لـعد ميـدانــه تعـنّــه
الميدان يرهب ابترتيبه --- اوهالشاب يلفي ابأساليبه
ويريد الشــمعه يبديها --- للخير شــمعتـه ايخلّيها
***
شاف العروس العشـگها --- غدت تتجسد اگباله
شافها ابعين البصيره --- مو وهـم مر ابخيالــه
عاين الوجه الشهاده --- وجــه فــتّان ابجـماله
عشـگته اوهوّه عشـگها --- ايريد يوصلها ابنضاله
وتريد من عنده المهر --- ايكرّمها من دم النحر
اوجاسم تسارع للفخر --- اهنا لـگه فرصة مجاله
اتناديه اولايبتعد عنها --- ويريد بسمه يعنونها
اشمتريد جاسم يرضيها --- للخير شمعته ايخليها
***
هيّه مابين الصوارم --- والرماح ابدت شكلها
يعرف اعروس الشهاده --- هذا موقعها اومحلها
ابكل وسيله ايريد جاسم --- يعتني ليها اويصلها
كُتل من ذيـچ الكتايب --- گام جاسم ينحرالها
الحاجز يزيحه ابهمّته --- ذيـچ الزلم ماهمته
يـوصل يــريد الغايته --- قبلتـه اوهوّه قبلها
الأبطال لاتعجب ابفعله --- هالشاب منهو اومنهو اهله
الكرار نشئته امربيها --- للخير شمعته ايخليها
***
استهونت بي بالبدايه --- الـگوم گالت مايقاوم
گــالت اتخـوّفـه رمح ولّـه ابـطرف صـــارم
تنذه لنها تشوف الثقه --- العنده اوبيها هاجم
وينها الـگالت نخوفه --- هيّه لاذت بالهزائم
عرّف اللي ماعرفته --- من علي استارث شمرته
يرعب اگلوب ابصرخته --- اوصارمه يحصد جماجم
هالشاب من جدّه شمراته --- للـگوم عرّفها ابذاته
هالذات شمعه ابمعاليها --- للخير شمعته ايخليها
***
هوّه بالميدان يلعب --- دوره عالفرّس تقدّم
وابو الأكبر شبح عينه --- ايراقبه من المخيّم
لن سمع جاسم ينادي --- ايصيح گوم ادركني ياعم
حسين يـگصد ليه اوينظر --- جسمه بالحومه تخذّم
أيـگلّه ياعمي وفيت اوياك عهدي اوشاهدي الدم
ياعمي هذي فرحتي --- دمي عوض عن زفتي
الديني اضحّي ابرگبتي --- بس اريدن ديني يسلم
المعناه خلّد اجل صوره --- للناس عن موقفه اودوره
بدماه صورته امحلّيها --- للخير شمعته ايخليها
***
لمن شافه ابهذا وضعه --- اشلون صار حسين عمّه
چـم سـهم چـم طبره اوچـم طعنـه شـاهدها ابجسـمه
لايحملــه للخيام اولـو تشـــوفه اتمــــوت عمــتـه
ماتدري رمله ابحالته طاح الشباب ابحومته
ضنوتها گطعوا رگبته
خل تضل رمله حزينه --- ابنار جمرتها اعله ابنها