يافكرة كل انسان --- انته الحي بالوجدان
يحسين الأنسانيه --- والفكره الوجدانيه
واضح بيها البرهان --- إنته الحي بالوجدان
......................
مادام اكو انسان واعي ايفكّر
مادام اكو حر والعقل متحرر
حي انته حي اگبال كل متبصر
انتـه النـور وللعقـول إتــنوّر
إنته الحس والمحسوس --- إنته البليد ملموس
إنته الجوهر مووهمي --- غنته التفكير العلمي
متركّز بالأذهان --- إنته الحي بالوجدان
......................
هذا انته يحسين ابعقول الأحرار
هذا انته يمّهد ادروب ألأحرار
هذا انته اليتدوي بجميع الأقطار
هذا انته ياالحي ابجميع الأدوار
إبهالصفات ايرسموك --- ثاير حي إيسموك
العنوان اللايـگ لإسمك --- مكتوبه احروف ابدمّك
يحسين ابهالعنوان --- إنته الحي بالوجدان
.....................
آراء كــتاب الأمـم نـــقراها اعجاب كلها ابثورتك شفناها
بعقولها إتحلل غدت معناها
ياريتنه احنه ابوعي عرفناها
ونعيف السلبيات --- ونعرف جوهر الذات
الذات التنفع للوادم --- ذات الماتقبل ظالم
يالمتحدي الطغيان --- إنته الحي بالوجدان
.......................
شتـﮕول كتّاب الأمم وشتكتب
عنك وكل كاتب غده متعجّب
اتـﮕول الحسين اندفع موعن منصب
ثوره اندفع عاليظلم اوعاليغصب
إيحرّر للأمه گام --- من اقيود الظلّام
ههـچي التاريخ اترسمه --- ابكل السان إنته الـچلمه
ياچلمة كل انسان --- إنته الحي بالوجدان
................................
ياعين ماطاب إلها عالضيم النوم
ياســـاعد الماذل لعد ذيـچ الـﮕوم
ياراي مايتوجــه اعلـــــيه اللوم
الواجب دعاك ابثوره جباره اتـﮕوم
من شفت ألأمه ابقيد --- يتلاعب بيها ايزيد
حطمت القيد ابثوره --- وحطمت ايزيد اوقصره
اوگلت الحر ماينهان --- إنته الحي بالوجدان
........................
شنهو الدعاك اتـﮕوم تحمل اتعاب
إتقدّم ضحايا الشاب من بعد الشاب
شاهدت هالأمه أخذها ألإرهاب
ما ترد للرمـيه البـيها تنـصاب
الهاي ألأمه حاميت --- عنها وإلها ضحيت
ما ضلّيت إتجاريها --- وترضه اشما صار اعليها
ثاير عفت ألأوطان --- إنته الحي بالوجدان
..........................
وغيرك بـﮕت عينه ابحذر مشبوحه
ينوح اويظن تفرج الدنيه ابنوحه
يتمنّه ويريد وحريص ابروحه
ولايرضه يتحمّل إبجسمه اجروحه
ولا يرضه ايضحي الروح --- ولايحمل جسمه اجروح
هذا اشينفع للأمه --- ودمّك أثمن من دمّه
وضحيته اوموخسران --- إنته الحي بالوجدان
..........................
شفت الرجال بأجتماع الكعبه
تحـچي ابلسنها وبالـﮕلوب الرهبه
واحـد يـﮕـلك هـالأمر إجتـنبـه
اواحد يـﮕول الثوره خطره اوصعبه
وبعيونك گمت اتشوف --- عالوادم صار الخوف
هاي اويا إشجايبها --- متباصرها وتصحبها
متسلّح بالإيمان --- إنته الحي بالوجدان
.......................