على زينب يحامي الجار --- عاين قسوة الحاله
تحضر كربله وتشوف --- ساعات الرعب والخوف
من ايطيح اخوها وتوگف ابداله --- عاين قسوة الحاله
.........................
الثوره قائد اومبدأ --- ينوضعن حجر أساس
كل عنصر اليتبعها --- ابدوره ينجعل حساس
ابقيادتها اومبادئها --- لمتن تنعتلن تنــــقاس
المشبوها ابمهدها اتموت --- وبأقصر عمر تنداس
والحرّه يخطها الذوق --- على انظف وجه قرطاس
من هالمنطلق بالذات --- نحـچي عن اخت عباس
كفيله اوحامله مبدأ --- وللثوره لسان اوراس
ابأصلب عود بالمحنه --- ما حطّم عزمها اليأس
يصيح احسين وبعلمه --- ماتم بالرجال انفاس
من منكم يقدملي --- جواد الموت ياهالناس
إهنا زينب تـﮕوم ابدور --- من قسوه اوأرق احساس
عن رقّه اوصلابه اتفوت --- إتقدمله جواد الموت
تدري ايموت وتقدمله الخياله --- عاين قسوة الحاله
....................
اريدن أحـچي للتاريخ --- وأريده ايركّز النظره
حته انـچان ما كاتب --- يكـتب واقــــع الحـرّه
يشوف اشلون نشأتها --- ابوسط يابيت يافتره
الوادم سمعوا انولدت --- بت للوصي امن الزهره
وگالوا علي امسميها --- العقيلــه زينب الكـــبره
ابأنظف بيت نشأتها --- على انظف ثدي ابدرّه
ابتسامتها ابوجه حيدر --- امن يضمها لعد صدره
ركضتها الرسول الله --- طفلع اتقبّله ابنحره
تشب وادورج اويه حسين --- الآخر يوم من عمره
لهنا والقدر مد ائيد --- سدد للشرف سطره
هاي المارئتها العين --- محجوبه ابحجاب الدين
لنها ابظهر ناگه اووره الجماله --- عاين قسوة الحاله
........................
أستأذن يحامي الجار --- ولـو هالفاجعه مرّه
ويــه التعزيه إنهنيك --- ابزينب گلبك إنسرّه
هاذي مثل اخوها حسين --- تحملك الف ذكره
بطلــة كربلــه هـــاذي --- إلـها دور بالـثوره
الجيش الزينبي هاذي --- موحسبة مره اميسره
هـــاي ارباتكم تحمل --- مــن أوصافكم كــثره
إقدامكم اوصبر حسين --- او صوت الوالده الزهره
ابوقف لو امصادف حيد --- انخلع گلبه گبل صبره
حرم تصرخ ابوسط النار --- ألأهل ثاوين عالغبره
تجي المصرع اخوها حسين --- ابمصير المحد ايحزره
على أثبت بصــيره اوراي --- لله إتجهــــت ابنــظره
على أكمل ثقه ابإيمان --- اعله حكمه اتحمد وتشكره
يالخالق اقدم حسين --- قربان اوفده الهالدين
مذبوح اوسهم نابت ابدلاله --- عاين قسوة الحاله
.......................
عاينها يحامي الجار --- يوم العاشر اشتنقاس
كل لحظه التمر بيها --- اتجرّعها النوايب كاس
هالساعه انصرع جسام --- هسا خمدت الانفاس
هساعه انوله الاكبر --- هالساعه انطبر عالراس
هالساعه ابرت چفين --- هالساعه التوه العباس
هسا طاح اخوها حسين --- هسا بالخيول انداس
هسا زحف ليها الجيش --- هسا غابت الحراس
هساعه الخييم تلهب --- هسا فرهدتها الناس
هساعه وهي ابهالحال --- اجاها الليل ليل الياس
هساعه الرهيبه اتـﮕوم --- تحاچـي الليل ابصلب باس
لاتهتم يليل البين --- آنه انطر اعيال حسين
مايرضه الولي ينطرها چتاله --- عاين قسوة الحاله
........................
لعد زينب بعد موقف --- ابطبّت كوفة الشدّه
دار اوعاصمه الحيدر --- اوزينب عايشه ابعهده
طبتها لـچن شتشوف --- على يابــيت تتـــعدّه
على ناگه وره السجاد --- الحبل جيدها الزنده
الحبل من ينسحل كلهن --- فرد گومه اوفرد گعده
إجن طبّن على ابن زياد --- وهو امعزز ابجنده
نظرهن بالحبال او گام --- ينشد وحدة وحده
كل نيته ايعرف زينب --- حتى ايغيضها ابحقده
نظرها اوصاح ياهذي --- المتنكره او مبتعده
عليـچ اقسم ابراس حسين --- شتكونين من عنده
صاحت حلّفتني ايمين --- آنه زينب آنه واخت حسين
ياذباح اخويه اوسابي اعياله --- عاين قسوة الحاله
................................
مع ماعاشت المأساة --- نره الثائره ألإنسانه
العقيله زينبة هاشم --- وابو طالب اوفتيانه
ابقصر الطاغيه اليرهب --- ابوجوها اوجنه واعوانه
ابصلابة حيدر الوالد --- وإباء حسين وإيمانه
تـﮕوم اتخاطب بن زياد --- بكلام اليـﮕطع السانه
الفاجر يفتضح وانته --- الفاجر يبن مرجانه
يعني دولة ألاسلام --- اوجهد النبي اوبنيانه
ابقبضة ابن لاشرعي --- يزيد اليكرع ادمانه
ابقبضة من يره التنكيل --- لحن من اعذب الحانه
ابقبضة من يره ألأمه --- حلوب اتدر على السانه
ابقبضة ابن هند الشام --- اومرجانه اومروانه
ابقبضة من فتك بحسين --- اويزعم خارجي اعله الدين
متقمص الدين وهوه چتاله --- عاين قسوة الحاله
...............................