أمشي بالمقبره...و السمه مظلمه
اتوقفت يم قبر...بيه اسم فاطمه
و السمه مظلمه
مقبره و ليل و متاهه و آنا أمشي وتيهت...قطعه مكتوبه شفتها عالقبر و تفاجئت
شابة و علوية هذي و من اسمها استغربت...فاطمه محمد اسمها و آني يمها اتوقفت
سلّمت و بحذر...و المدامع نهر
أنظر اعله الاسم...و أنظر اعله السمه
و السمه مظلمه
ودي أعرف سبب موتج حته عنج أرتحل...حادث السبّب وفاتج لو مريضه لو قتل
هم تركتي لج يتامه و ميت بروحج طفل...هم يتيمه انتي يفاطم لو بقه الوالد عدل
هم إجه عاذلج...يشتم بوالدج
اضلوعج اتكسرت...لو بقت سالمه
و السمه مظلمه
هم وصل ظالم الدارج و اقتحم باب الخدر...هم وره الباب الثقيلة لذتي و الغاية الستر
هم مثل وجه الزجية غفله وجهج منسطر...و الكسر كسر المشاعر و الضلع خل ينكسر
هم كسر لج ضلع...و الكسر ينسمع
هم نخيتي علي...و انتي متيتمه
و السمه مظلمه
بالله يا علوية أسأل من وصل ليج الأجل...هم إجت ناس الوداعج و القرايب و الأهل
و السؤال المهم عندي من وصلتي المغتسل...هم سمعتي طفله تبجي و تلطم الراس بوجل
و الطفل ينهدم...من يحس باليتم
و انتي أعرف بعد...ونته مؤلمه
و السمه مظلمه
دفنتج بالظلمه صارت مثل فاطم يا تره...لو نهار و كلها تدري القاصي و الداني دره
ظل قبر أمنه الزجية يدري بيه بس حيدره...و الله لو أندل قبرها إلا شيب المقبره
و الخسف للصدر...فاطمه بلا قبر
ما أريد الدمع...لازم أبجي دمه
و السمه مظلمه
ما بقت عندج يتيمه شافت اسياط المتن...و لا أظن عندج حبيب اعله النهر ضامي يون
نزلت بصدره الحوافر سحنت اضلوعه سحن...و لا بقه عندج ذبيح اثلث ليالي ابلا دفن
هم إلج عايله...تنسبي بكربله
لا طفل ينذبح...من سهام الضمه
و السمه مظلمه
خلصت معظم حديثي و الفجر قرب يطر...صدت اعيوني بدمعها عالمنارات الصفر
يا علي بزينب أحلفك و الدموع البليسر...قبل لا توصل منيتي رايد أندل القبر
ناري ما تنطفي...و القبر مختفي
بس أشم تربته...ها يحامي الحمه
و السمه مظلمه
أبجي من أقره اسمها عالقبر وبلا وعي...و أطبر الراس بقبرها و أقره أطوار النعي
أدري مو هيه و لكن صعبه أملك مدمعي...مره ألطم وجهي بيدي مره أعض بأصبعي
فاطمه علتي...جرحي و امصيبتي
يا علي أيست...كلمة الخاتمه
و السمه مظلمه
